საქართველოს სტატისტიკის ეროვნული სამსახურის (საქსტატი) მონაცემებით, 2015 წლის 1 იანვრის მდგომარეობით, საქართველოს მოსახლეობა 3 729,5 ათას ადამიანს შეადგენს. აღნიშნული სტატისტიკით, ქვეყნის მოსახლეობამ 2002 წელთან შედარებით 14,7 %-ით იკლო.
ინფორმაციის თავისუფლების განვითარების ინსტიტუტი(IDFI) საზღვარგარეთ მცხოვრები ქართველების შესახებ დიასპორის საკითხებში საქართველოს სახელმწიფო მინისტრის აპარატიდან მისთვის მოწოდებულ არაოფიციალურ სტატისტიკურ მონაცემებს აქვეყნებს. თუმცა უწყება განმარტავს, რომ ქართველების დიდი ნაწილი საზღვარგარეთ არალეგალურად იმყოფება და საკონსულო აღრიცხვაზე არ არის. ამასთან, საკმაოდ დიდია სხვადასხვა ქვეყნებში მათი გადაადგილების ინტენსივობა. შესაბამისად, დიასპორის საკითხებში სახელმწიფო მინისტრის აპარატს დაზუსტებული მონაცემები არ აქვს.
არაოფიციალური სტატისტიკური მონაცემებით, საზღვარგარეთ დაახლოებით 1 607 744 ქართველი იმყოფება. აქედან ყველაზე მეტი რუსეთის ფედერაციაში ცხოვრობს. მათი რაოდენობა 800 ათასს აღწევს, რომელთაგან 285 915 (2009წ.) რუსეთის ფედერაციის მოქალაქეა.
მეორე ადგილზე საბერძნეთია, 250 ათასი ადამიანით, თუმცა აქედან 100 000-მდე ეთნიკური ბერძენია. მას მოსდევს უკრაინა, სადაც 150 ათასი ქართველი ცხოვრობს.
არანაკლებ ბევრი ქართველი ცხოვრობს შემდეგ ქვეყნებშიც: თურქეთი (100 ათასი), ამერიკის შეერთებული შტატები (80 ათასი), აზერბაიჯანი (35 000), ესპანეთი (30 ათასი), გერმანია (25 ათასი) და ა.შ.
მოწოდებული 43 ქვეყნის მონაცემებიდან დიასპორის სიმცირით ავსტრალია (20), იაპონია (100), ყირგიზეთი (200), ლიტვა (300) გამოირჩევიან.
უწყების მიერ მოწოდებულ მონაცემებში თურქეთსა და ირანში ისტორიული დიასპორის წარმომადგენელთა რიცხვიცაა აღნიშნული. თურქეთში მათი რაოდენობა მილიონზე მეტია, ხოლო ირანში 35 ათასს აღწევს.