იუსტიციის სამინისტრო მოსამართლეთა გაძლიერების მიზნით ინკვიზიციურობის ელემენტების შემოტანას გეგმავს, - ამის შესახებ იუსტიციის მინისტრმა, თეა წულუკიანმა პარლამენტში, კომიტეტების გაერთიანებულ სხდომაზე განაცხადა, სადაც მინისტრებს ნდობის გამოსაცხადებლად უსმენენ.
მისი თქმით, დღეს სასამართლოში საქმის განხილვა მთლიანად შეჯიბრებითობის პრინციპზეა აგებული და „ისე, რომ სისხლის სამართლის საპროცესო კოდექსი არ დაზიანდეს, ნელ-ნელა, იმ დოზით, რაც დასაშვებია, შემოიტანენ რანდენიმე ინკვიზიციურობის ელემენტს".
„ეს არის, ჯერჯერობით, მსჯელობის საგანი, საბოლოო პროდუქტს კი სისხლის სამართლის უწყებათაშორის საკოორდინაციო საბჭოშიც განიხილავენ“, - აცხადებს წულუკიანი.
მთავრობის განახლებული შემადგენლობისა და სამთავრობო პროგრამისთვის ნდობის გამოცხადების საკითხს პარლამენტი 8 მაისს პლენარულ სხდომაზე განიხილავს.
ინკვიზიციურობის პრინციპის მიხედვით, მოსამართლეს უფლება აქვს, საკუთარი ინიციატივით მოიპოვოს მტკიცებულებები, მხარეებს მისცეს მითითებები, მოსთხოვოს მათ სარჩელის ან შეგებებული სარჩელის დაზუსტება, საქმის განხილვისას მოიწვიოს მესამე მხარეები და მხარეებს დაავალოს გარკვეული მტკიცებულებების მოპოვება. მოსამართლე ასევე უფლებამოსილია მტკიცებულებები თავად მოიპოვოს, რათა საქმის ყველა ასპექტი შეისწავლოს და სამართლიანი გადაწყვეტილების გამოტანა გაუადვილდეს.
შეჯიბრებითობის პრინციპის მთავარი არსი მდგომარეობს იმაში, რომ მტკიცებულებათა მოპოვება, მოწმეთა მოძიება, მათი სასამართლოში დაბარება და მტკიცებულებების სასამართლოში პრეზენტაცია მხოლოდ ბრალდებისა და დაცვის მხარის კომპეტენციაა.
