ფონდი „ღია საზოგადოება - საქართველოს“ ინიციატივით, საქართველოში ბავშვთა ჰოსპისი გაიხსნება. როგორც ფონდში აცხადებენ, ჰოსპისის გახსნა 2016 წლისთვის იგეგმება და იქ უკურნებელი სენით დაავადებულ ბავშვებზე იზრუნებენ.

„ოცნებების სახლი“, „მსოფლიო რუკა“, „ვარსკვლავებზე ნადირობა“, „ცისარტყელის მიღმა“, „იმედის სახლი“ - ასეთი სახელწოდებებით არსებობს სხვადასხვა ქვეყანაში ბავშვთა ჰოსპისები - სახლები, სადაც 0-18 წლამდე ასაკის უკურნებელი სენით დაავადებულ ბავშვებზე ოჯახის წევრებთან ერთად ზრუნავენ ექთნები, ფსიქოლოგები, მოხალისეები.

გავრცელებულია მცდარი წარმოდგენა, თითქოს ჰოსპისი იგივე საავადმყოფოა. სინამდვილეში, მისი კონცეფცია გულისხმობს საავადმყოფოსგან სრულიად განსხვავებულ გარემოს, რომელიც ხშირად ბავშვებისთვის საყვარელი რომელიმე ლიტერატურული პერსონაჟის სახლს ან ფანტასტიკურ სამყაროს მოგაგონებთ", - აცხადებენ ფონდში.

მათივე ინფორმაციით, ბავშვთა ჰოსპისის შექმნაში, მათთან ერთად სამედიცინო კორპორაცია „ევექსი", საქართველოს პრეზიდენტი და ინდივიდუალური დონორები მონაწილეობენ.