ძლიერი წვიმის შედეგად მდინარე ალაზნის ადიდებამ და კალაპოტიდან გადმოსვლამ საქართველოს სახელმწიფო ელექტროსისტემის გადამცემი ხაზის „ბახტრიონის” ანძის წაქცევა გამოიწვია. ელექტროენერგიის მიწოდება შეუწყდა ახმეტის რაიონის სოფლების - ქისტაურის, ზემო და ქვემო ალვანის 6100 აბონენტს, - აღნიშნულის შესახებ „ლიბერალს“ საქართველოს სახელმწიფო ელექტროსისტემის წარმომადგენელმა განუმარტა.
უწყების ცნობით, ამ ეტაპზე დაზიანების კერა ნაწილობრივ აღმოფხვრილია და ზემო და ქვემო ალვანის 3600 აბონენტს ელექტროენერგია მიეწოდება.
„აღდგენითი სამუშაოები უწყვეტ რეჟიმში მიმდინარეობს და უახლოეს მომავალში ელექტროენერგიის მიწოდება სოფელ ქისტაურსაც აღუდგება“, - განაცხადეს საქართველოს სახელმწიფო ელექტროსისტემაში.
მდინარე ალაზნის ადიდებამ პრობლემები შეუქმნა მეცხვარეებსაც.
„ახმეტის მუინიციპალიტეტში წუხელ მდინარე ალაზნის პატარა კუნძულზე რამდენიმე ცხვარი დარჩა, თუმცა მდინარიდან ყველა მათგანის უვნებლად ამოყვანა მოხერხდა და ამ დროისთვის ზარალი არ ფიქსირდება. ადგილზე დილითვე მივიდნენ გამგეობისა და შესაბამისი სამსახურების წარმომადგენლები“, - აღნიშნულის შესახებ „ლიბერალს“ კახეთის სამხარეო გუბერნატორის ადმინისტრაციიდან განუმარტეს.