საყდრისი-ყაჩაღიანის ტერიტორიაზე დღეს მოსამართლე ნანა დარასელია სიტუაციის ადგილზე გასაცნობად ჩავიდა. იქ ასევე იმყოფებოდნენ არასამავრობო ორგანიზაციების წარმომადგენლები და არქეოლოგები. 

როგორც თბილისის საქალაქო სასამართლოში აცხადებენ, თბილისის საქალაქო სასამართლოს ადმინისტრაციულ საქმეთა კოლეგიამ განიხილა მოსარჩელე კახა კოჟორიძისა და გიორგი გოგოჭურის შუამდგომლობა, უზრუნველყოფის ღონისძიების გამოყენების თაობაზე, მოპასუხე საქართველოს კულტურის სამინისტროს, კულტურული მემკვიდრეობის დაცვის სააგენტოსა და საქმეში მესამე პირად ჩართული, „RMG Gold-ის" მიმართ. მოსარჩელეები ითხოვდნენ 2014 წლის 12 დეკემბერს გამოცემული ადმინისტრაციული აქტების მოქმედების შეჩერებას. აღნიშნული აქტების საფუძველზე, კომპანია „RMG Gold-ს" „საყდრისი-ყაჩაღიანის" არქეოლოგიური ობიექტის „აღება-დაშლის" თანხმობა მიეცა. 

სასამართლოს ინფორმაციით, უზრუნველყოფის ღონისძიებაზე საბოლოო გადაწყვეტილების მისაღებად, ადმინისტრაციულ საქმეთა კოლეგიის მოსამართლემ მიიღო განჩინება, მხარეთა მოწმეთა და სპეციალისტთა მონაწილეობით, ობიექტის ადგილზე დათვალიერების შესახებ.

დღესვე, საყდრისი-ყაჩაღიანის ტერიტორიაზე ადგილობრივ მოსახლეობასა და „საყდრისის დაცვის საზოგადოებრივი კომიტეტის" წევრებს შორის დაპირისპირება მოხდა.

მოსახლეობის თქმით, მათი რაიონისთვის საწარმოს მუშაობა აუცილებელია, რადგან სწორედ მასზეა დამოკიდებული მოსახლეობის უმეტესობის შემოსავალი. 

საყდრისის დაცვის კომიტეტის წევრები კი აცხადებენ, რომ ისინი საწარმოს გაჩერებას არ ითხოვენ. მათი თქმით, მთავრი მოთხოვნა, საყდრისის არქეოლოგიური ძეგლის გადარჩენაა.

„ვიმედოვნებ, არქეოლოგებიორ და ექსპერტები ჯეროვნად აუხსნიან მოსამართლეს თუ რისი გაკეთება შეიძლება და იქნება გამოძებნილი გზები იმისთვის, რომ როგორმე ძეგლის გადარჩენა მოხდეს. ჩვენ არცერთ ეტაპზე არ ვითხოვდით საწარმოს გაჩერებას, მაგრამ რაც შეეხება ძეგლს, ის უნდა იყოს გადარჩენილი და შენარჩუნებული. ვიმედოვნებთ, რომ მოსამართლე მიიღებს სწორ გადაწყვეტილებას", - აცხადებს საყდრისის გადარჩენის კომიტეტის წევრი ირაკლი მამალაძე.

მოსამართლის გადაწყვეტილება 18 მაისს გახდება ცნობილი, სწორედ ამ დროს არის ჩანიშნული სასამართლო პროცესი.