მედიის განვითარების ფონდი მედიამონიტორინგის ანგარიშის პრეზენტაციას მართავს, ქართულ მედიაში სიძულვილის ენისა და ქსენოფობიის შემცველი გამონათქვამების შესახებ.

მონიტორინგის თანახმად, რომელიც 2014 წლის 17 თებერვლიდან 2015 წლის 18 თებერვლამდე საკვლევ პერიოდს მოიცავს, მედიაში სიძულვილის ენისა და ქსენოფობიის 198 შემთხვევა აღინიშნა - 44 სიძულვილის ენას, 49 სხვადასხვა ეთნიკური და ეროვნული ჯგუფის მიმართ დისკრიმინაციას, 53  თურქოფობია/ისლამოფობიას, 25  არმენოფობიას, ხოლო 27  რელიგიური ნიშნით დისკრიმინაციას ეხება. 

მონიტორინგის შედეგების თანახმად, სიძულვილის ენისა და ქსენოფობიის ტირაჟირებით გაზეთი „ასავალ-დასავალი" ლიდერობს (53 შემთხვევა); მეორე ადგილს მედიაკავშირი „ობიექტივი" იკავებს - 37 შემთხვევით; სიძულვილის ენისა და ქსენოფობიის შემცველი 24 გამონათქვამი დაიბეჭდა „საქინფორმში; 22 - Geworld.ge; 19 - „კვირის ქრონიკა"; 14 - ტელეკომანია „კავკასია"; 12 - გაზეთი „ალია"; 6 - „რეზონანსი", 4 - „კვირის პალიტრა"; 2 - „რუსთავი 2"; 2 - „პრაიმტაიმი"; 2 - „პირველი"; 1 - საზოგადოებრივი მაუწყებელი.  

სიძულვილის ენისა და ქსენოფობიის შემცველი გამონათქვამებით მედიის შემდეგ საზოგადოების წარმომადგენლები ლიდერობენ - 187 შემთხვევით. კვლევის შედეგების მიხედვით, 46 შემთხვევაში სიძულვილის ენის შემცველ გამონათქვამებსა და ქსენოფობიას სასულიერო პირები, 21 შემთხვევაში ყოფილი ხელისუფლება, ხოლო 11 შემთხვევაში ხელისუფლება იყენებს. 

როგორც მედიის განვითარების ფონდის გამგეობის თავმჯდომარე თამარ კინწურაშვილი ამბობს, ორგანიზაცია კვლევის ფარგლებში ნაციონალური არხების საინფორმაციო გამოშვებებს, ტოქ-შოუებს, 6 გაზეთს აკვირდებოდა.