იუსტიიციის ყოფილი მინისტრის, ზურაბ ადეიშვილის თქმით, 2007 წლის 7 ნოემბერი ის პერიოდია, როცა „ოლიგარქის მიერ ხელისუფლების გადაფორმების პროცესი მიმდინარეობდა და სახელმწიფო ვალდებული იყო, გადამწყვეტი ნაბიჯები გადაედგა".

როგორც მან „არჩევანში" საუბრისას განაცხადა, მიტინგის დაშლის დროს არალეგიტიმურობა ცალსახად არ მომხდარა.

„ნამდვილად იყო საფუძველი. როცა საფრთხე დემოკრატიულ ინსტიტუტებს ემუქრება, სახელმწიფო ვალდებულია, იმოქმედოს. რიგ შემთხვევაში იყო ძალის გამოყენება გადაჭარბებულად და ამაზე რეაგირება მაშინაც მოხდა და შემდეგაც" - განაცხადა ადეიშვილმა.

კითხვაზე, ჰქონდა თუ არა ძალის გადამეტებას ადგილი ტელეკომპანაი „იმედში" შეჭრის დროს, ადეიშვილი პასუხობს, რომ გარკვეულ ექსცესებს ჰქონდა ადგილი.

„იმის გამო, რომ დემოკრატიული სახელმწიფოსთვის ძნელი იყო ასეთი ტიპის გამოწვევებისთვის გამკლავება, მით უმეტეს მაშინ, როცა პოლიტიზაცია დიდი იყო, როცა ასეთი სიტუაციის მართვის გამოცდილება არ არსებობდა, ბუნებრივია, გარკვეულ ექსცესებს ჰქონდა ადგილი. ძალის გადამეტებას ნამდვილად ჰქონდა ადგილი. ზიანი, რომელიც მაშინ „იმედს" მიადგა, სახელმწიფომ აანაზღაურა. ცალსახად შეიძლება ითქვას, რომ იმ დროს გარკვეული შეცდომები იყო" - თქვა ადეიშვილმა.

მისი განცხადებით, ივანიშვილი პოლიტიკაში ყოველთვის მონაწილეობდა.

„2004-შიც, 2005-შიც და 2006-შიც მონაწილეობდა პოლიტიკაში, შემდგომაც. კომუნიკაციის დონეზე ყოველთვის იყო ინფორმაცია, რომ მას პოლიტიკაში უნდოდა მოსვლა. ის გარკვეულ მოვლენებზე ზეგავლენის მოხდენას ცდილობდა. ამას 2004-2005 წლებშიც აკეთებდა ხელისუფლებასთან ერთად და მის გარეშეც" - თქვა ადეიშვილმა.

იგი მის წინააღმდეგ აღძრულ საქმეებს ფაბრიკაციას უწოდებს.

„ძნელი წარმოსადგენია, რომ წამებაში ბრალდებულ ადამიანს ჰქონდეს საშუალება, სამ ქვეყანაში იყოს მთავრობის კონსულტანტი, ჰქონდეს საშუალება, შეხვდეს სამთავრობო დონის წარმომადგენლებს, არასამთავრობო ორგანიზაციებთან ერთად მოამზადოს ბევრი პროექტი. ინტერპოლმა მიიღო გადაწყვეტილება ჩემი ძებნიდან მოხსნის შესახებ. ეს არის პოლიტიკური მანიპულაცია და არა რეალურ ფაქტებზე დაფუძნებული" - განაცხადა მან. 

იუსტიციის ყოფილი მინისტრის, ზურაბ ადეიშვილის წინააღმდეგ საქართველოში სისხლის სამართლის 3 საქმის წარმოება მიმდინარეობს: ციხეში პატიმრის წამების, „ქართუ ბანკის“ გაკოტრებისა და 7 ნოემბრის და ტელეკომპანია „იმედში“ უკანონო შეჭრის საქმეები, რომელშიც ყოფილ მინისტრს ბრალი 4 ყოფილ მაღალჩინოსანთან ერთად აქვს წარდგენილი.