წყნეთის ქუჩაზე მე-13 კორპუსისა და მისი მიმდებარე ტერიტორიიდან გვიან ღამით ევაკუირებული მოსახლეობის ნაწილი დილიდან ისევ წყნეთის ქუჩაზეა. მიუხედავად იმისა, რომ სახლებში შესვლა არ შეუძლიათ, მთელ დღეს ეზოში ატარებენ.

მზია მოსიკაშვილის საცხოვრებელი სახლის კიბეები ჰაერშია. მდინარე ვერეს ნაკადმა მისი კუთვნილი ავტოფარეხი და სახლამდე მისასვლელი გზა მთლიანად მოგლიჯა. მოსიკაშვილი ამბობს, რომ 2012 წლიდან, მას შემდეგ, რაც მდინარეს კალაპოტი შეუცვალეს და პირდაპირ მათი სახლებისკენ მიმართეს გვირაბი, ყოველ თვე შეჰქონდა განცხადება კეთილმოწყობის სამსახურში, დახმარების თხოვნით.

„ყოველ თვე ვემუდარებოდი კეთილმოწყობის სამსახურს, დიდი ქვები ჩაელაგებინათ, რომ სახლს ძირი არ გამოსთხროდა. არავინ მომისმინა. პირადად მყავს გიგი უგულავა ნანახი, პირადად დამპირდა, რომ დამეხმარებოდა, თუმცა უშედეგოდ. ბოლოს რომ მივედი, წინა თვეში, მითხრეს, რომ განიხილავდნენ საქმეს. დადგნენ და განიხილონ ახლა. მე უკვე უსახლკაროდ ვარ დარჩენილი. უსახკლაროდ დარჩენის გარდა, წყნეთის მოსახლეობას სხვა პრობლემაც აწუხებს. მათი თქმით, სასტუმროში მხოლოდ სამი დღით გაჩერების უფლება აქვთ. გამგეობის წარმომადგენლებმა უთხრეს, რომ სამი დღის შემდეგ ქირით მოუწევთ გასვლა. „გვეუბნებიან, რომ 500 ლარის ფარგლებში უნდა მოვნახოთ ბინა. 500 ლარად ბინა როგორ მოვნახოთ. ჩვენი ოჯახი ექვსსულიანია. სულ მცირე 3-ოთახიანი ბინა მაინც გვჭირდება“, - ამბობს წყნეთის ქუჩის ერთ-ერთი მცხოვრებელი.