სახელმწიფო უსაფრთხოების და კრიზისების მართვის საბჭოს მდივნის, მინდია ჯანელიძის თქმით, როდესაც აცხადებდა, რომ მტაცებელი ცხოველების მხრიდან მოსახლეობას საფრთხე აღარ ემუქრებოდა, ის სხვადასხვა უწყების, მათ შორის ზოოპარკის ადმინისტრაციის ინფორმაციას ეყრდნობოდა.
"ეს ინფორმაცია ეყრდნობოდა ზოოპარკის ადმინისტრაციის ინფორმაციას. ეს ინფორმაცია პირველად ჩვენთან საბჭოში შემოვიდა ორშაბათს შუადღისით, რომ მტაცებელი ცხოველები ზოოპარკს მიღმა არ არიან, თუმცა არ გავავრცელეთ. მთელი დღის განმავლობაში ვამოწმებდით ზოოპარკთან, შინაგან საქმეთა სამინისტროსთან, რომელსაც იგივე ინფორმაცია ჰქონდა. შესაბამისად, ეს ინფორმაცია გადამოწმების გარეშე ანგარიშში არ მოხვედრილა. ზოოპარკის დირექტორმა არაერთხელ განაცხადა ღია ეთერში და კომენტარებში, რომ მტაცებელი ცხოველები არ იყვნენ ზოოპარკის მიღმა. ჩვენ ვეყრდნობით იმ ინფორმაციას, რა ინფორმაციას აქვს უწყებებს. ეს იყო მერია, შსს და თბილისის ზოოპარკი", - განუცხადა ჯანელიძემ.
