ფინანსთა მინისტრის, ნოდარ ხადურის თქმით, თბილისში 13 ივნისს სტიქიის შედეგად დაზარალებულებისთვის ახალი სახლების მშენებლობის მიზნით მთავრობა და თბილისის მერია მიწას გამოყოფენ.
როგორც ხადური ამბობს, ევროკავშირმა უკვე გამოხატა მზადყოფნა, სახლების მშენებლობისთვის 3 მილიონი ლარი გამოყოს.
„ევროკავშირმა უკვე გამოხატა მზადყოფნა, რომ სახლების მშენებლობისთვის საქართველოს 3 მილიონი ევრო გადმორიცხოს. ჩვენ, მთავრობა და თბილისის მერია კი მიწას გამოვყოფთ მშენებლობისთვის", - ამბობს ხადური.
ხადურის ინფორმაციით, მთავრობა აქტიურად მუშაობს საერთაშორისო დონორებთან და სხვადასხვა ქვეყანასთან.
„აქტიურად ვმუშაობთ მსოფლიო ბანკთან. გერმანულ მხარესთან, შვეიცარიელებთან, შვედებთან, თურქებთან იმისთვის, რომ მივიღოთ როგორც ფინანსური, ისე ტექნიკური დახმარება. საქართველოში ჩამოვლენ ექსპერტები, გეოლოგები, რომლებიც ადგილზე შეისწავლიან ვერეს ხეობას და ზოგადად თბილისში არსებულ ვითარებას", - აღნიშნა ნოდარ ხადურმა.
