BILETEBI.GE-მ UEFA-ს სუპერთასის თამაშზე დასასწრები ბილეთების გაყიდვა განაახლა. 4 300 ბილეთი, რომელთაც biletebi.ge ყიდის, როგორც ქართველ, ასევე უცხოელ გულშემატკივარზე გაიცემა.
„ნებისმიერს შეუძლია, ჩადგეს რიგში და მიიღოს მონაწილეობა ყიდვის პროცესში“, - ამის შესახებ „ლიბერალს“ biletebi.ge-ს ტექნიკურმა დირექტორმა, ლაშა ჩხიკვიშვილმა უთხრა, თუმცა მისთვისაც უცნობია, რატომ მიიღო UEFA-მ მათთვის ბილეთების რეალიზაციის დაბრუნების გადაწყვეტილება.
როგორც ის განმარტავს, დანარჩენ 22 000 ბილეთს საქართველოს ფეხბურთის ფედერაცია სალაროებში გაყიდის.
„გულშემატკივრებს შეუნარჩუნდებათ biletebi.ge-ზე ნაყიდი ბილეთები, ახალი ბილეთები კი სალაროებში გაიყიდება. ხვალ გვექნება მოლაპარაკება UEFA-სთან, რა სისტემით გაიყიდება ბილეთები. რამდენიმე დღე დაგვჭირდება მათ დასაბეჭდად" - ამბობს ფედერაციის პრეზიდენტი ზვიად სიჭინავა.
მისი თქმით, ფედერაციას ურჩევნია, რომ გულშემატკივრებს გაყიდვების ძველი მეთოდი შესთავაზოს, რათა ონლაინ გაყიდვების ხარვეზი გამოირიცხოს.
მისი განმარტებით, 2063 გულშემატკივარს, რომელმაც ბილეთები biletebi.ge-ზე შეიძინა, პრობლემა არ შეექმნება.
გუშინ biletebi.ge-ზე ბილეთების გაყიდვა შეწყდა. როგორც „ლიბერალს“ biletebi.ge-ს ტექნიკურმა დირექტორმა, გიორგი ჩხიკვიშვილმა უთხრა, მათ გაყიდვის შეწყვეტა UEFA-ს თავად შესთავაზეს, რადგან გაყიდვის სიჩქარე საკმარისი არ იყო იმისთვის, რომ ბილეთები რამდენიმე დღეში გაყიდულიყო, ამასთან მომხმარებელი უკმაყოფილოა იმის გამო, რომ საათობით რიგში დგომის მიუხედავად ისინი უსაფრთხოების სისტემამ მაინც დაბლოკა.
