სახელმწიფო უსაფრთხოების სამსახურის უფროსის თანამდებობაზე პარლამენტმა ვახტანგ გომელაურის კანდიდატურა 83 ხმით დაამტკიცა.

პრემიერ-მინისტრმა, ირაკლი ღარიბაშვილმა შინაგან საქმეთა მინისტრ ვახტანგ გომელაურის კანდიდატურა აღნიშნულ თანამდებობაზე 20 ივლისს წარადგინა.

1 აგვისტოდან ძალაში შედის საკანონმდებლო ცვლილებები, რომლის თანახმად, შინაგან საქმეთა სამინისტროს სპეცსამსახურები გამოეყოფა და ცალკე ორგანოდ (სახელმწიფო უსაფრთხოების სამსახური) ჩამოყალიბდება. ცვლილების ფარგლებში, სახელმწიფო უსაფრთხოების სამსახურის შემადგენლობაში გადავა ისეთი დანაყოფები, როგორიც არის: კონტრდაზვერვის დეპარტამენტი, კონტრტერორისტული ცენტრი, სახელმწიფო უსაფრთხოების სამსახური, ანტიკორუფციული სააგენტო, სპეციალური ოპერაციების დეპარტამენტი – ე.წ. შავნაბადას დანაყოფი. 

კანონში განსაზღვრულია სახელმწიფო უსაფრთხოების სამსახურის უფროსის დანიშვნის წესი: კანდიდატურას მთავრობას პრემიერ-მინისტრი წარუდგენს, ხოლო მთავრობის მიერ კანდიდატურის მოწონების შემთხვევაში, იგი ასარჩევად პარლამენტს წარედგინება. კანონის თანახმად, საქართველოს პარლამენტი, სამსახურის უფროსს 6-წლის ვადით ირჩევს. ერთი და იმავე პირის არჩევა სამსახურის უფროსის თანამდებობაზე არ შეიძლება ზედიზედ ორჯერ.

როგორც კანონპროექტის ავტორები განმარტავენ, სახელმწიფო უსაფრთხოების სამსახური ორმაგ დაქვემდებარებაში იქნება: ის ანგარიშვალდებული იქნება პარლამენტისა და მთავრობის წინაშე.

შინაგან საქმეთა სამინისტროში კი საპოლიციო დანაყოფები რჩება: კრიმინალური პოლიცია, საპატრულო პოლიცია, შინაგან საქმეთა სამინისტროში შემავალი საჯარო სამართლის იურიდიული პირები (მომსახურების სააგენტო, დაცვის პოლიცია, საგანგებო სიტუაციების სააგენტო). 

ჯერჯერობით, უცნობია, ვინ იქნება შინაგან საქმეთა მინისტრი.