მთავრობამ 27 ივლისის #376 დადგენილებით,  ხორბლის ფქვილის შესახებ ტექნიკური რეგლამენტი დაამტკიცა. ტექნიკური რეგლამენტით, ხორბლის ფქვილის წარმოების, გადამუშავებისა და დისტრიბუციის რეგულირების ერთიანი პრინციპები და მომხმარებელთა უფლებების დაცვა განისაზღვრება.

ტექნიკური რეგლამენტი ხორბლის ფქვილის ბაზარზე განთავსების პირობებს, ხორბლის ფქვილისა და ბიზნესოპერატორის მიმართ ჰიგიენის მოთხოვნებს ეხება.

დადგენილებაში აღნიშნულია, რომ ბაზარზე განთავსებული ხორბლის ფქვილი უნდა აკმაყოფილებდეს საქართველოს კანონმდებლობით განსაზღვრულ უვნებლობის მოთხოვნებს.

ასევე - ბაზარზე განთავსებული ხორბლის ფქვილი ეტიკეტირებული უნდა იყოს, როგორც „ხორბლის ფქვილი".

ფორტიფიცირებული (გამდიდრებული) ხორბლის ფქვილის ეტიკეტზე პროდუქტის დასახელებასთან ერთად უნდა გამოიყენებოდეს ტერმინები: „ფორტიფიცირებული“ ან „გამდიდრებული“, ამათან, ეტიკეტზე მიეთითოს ფორტიფიკანტის დასახელება, რაოდენობა და პროდუქტის სადღეღამისო მოხმარების ნორმა.

რაც შეეხება ხორბლის ფქვილის მიმართ ზოგად მოთხოვნებს, დოკუმენტში აღნიშნულია, რომ  ნებისმიერი ინგრედიენტი, რომელიც ემატება ხორბლის ფქვილს, საქართველოს კანონმდებლობის, შესაბამისად, უნდა იყოს უვნებელი და ადამიანის მოხმარებისათვის დაშვებული. ხორბლის ფქვილს არ უნდა ჰქონდეს უცხო სუნი და გემო, არ შეიცავდეს ცოცხალ მწერებს, ის არ უნდა იყოს დაბინძურებული (მათ შორის, ცხოველური წარმოშობის მინარევებით, მკვდარი მწერებით), რომელიც შესაძლოა, რისკს უქმნიდეს ადამიანის ჯანმრთელობას.

ხორბლის ფქვილის მიმართ სპეციფიკური მოთხოვნებია, ჰქონდეს ფქვილისათვის დამახასიათებელი გემო, სიმჟავისა და სიმწარის გარეშე. ჰქონდეს დამახასიათებელი სუნი, შმორისა და ობის უცხო სუნის გარეშე.

დადგენილებით, დაუშვებელია ხორბლის ფქვილის დაბინძურება და დასნებოვნება მავნებლებით. დოკუმეტის მიხედვით, დაღეჭვისას არ უნდა იგრძნობოდეს ხრაშუნი.

რეგლამენტით, ბიზნესოპერატორები ვალდებულნი არიან, ფქვილის შენახვის ვადად დაადგინონ არა უმეტეს 70% ჰაერის ფარდობითი ტენიანობა და არა უმეტეს 250C ტემპერატურის პირობები.

იმპორტის სასაქონლო ოპერაციისათვის განკუთვნილი ტომრებით დაფასოებული ფქვილის გადაადგილებისას ბიზნესოპერატორმა უნდა უზრუნველყოს მათი განთავსება პალეტებზე.

ხის პალეტების გამოყენების შემთხვევაში, ისინი უნდა დამუშავდეს მცენარეთა დაცვის საერთაშორისო კონვენციის ფიტოსანიტარიული ზომების საერთაშორისო სტანდარტის - ISPM 15-ის შესაბამისად.