სამხრეთ კორეამ ჩრდილო კორეასთან შეთანხმების ფარგლებში, დაძაბულობის განმუხტვის მიზნით, საზღვართან ჩართული დინამიკები გამორთო - ამის შესახებ ინფორმაციას BBC ავრცელებს.
საზღვარზე დინამიკებით ტრანსლაცია დანაღმულ ტერიტორიაზე ორი ჯარისკაცის დაშავებას მოჰყვა.
ქვეყნებმა შეთანხმებას მას შემდეგ მიაღწიეს, რაც ჩრდილო კორეამ, რომელიც თავდაპირველად ტერიტორიის დანაღმვას უარყოფდა, მომხდარის გამო „სინანული" გამოთქვა.
სამხრეთ კორეის პრეზიდენტმა განაცხადა, რომ შეთანხმებამ, შესაძლოა, ორ ქვეყანას შორის პრობლემები ერთმანეთის მიმართ ნდობის გამოცხადებით მოაგვაროს.
ჩრდილო კორეა სამხრეთ კორეას „ძლიერი სამხედრო მოქმედებებით" დაემუქრა, იმ შემთხვევაში, თუ სამხრეთ კორეა საზღვარზე დინამიკებს არ გამორთავდა და ტრანსლაციას არ შეწყვეტდა. დინამიკები, რომლებიც სამხრეთ კორეის ტერიტორიაზე, საზღვართან იყო ჩართული, ახალ ამბებს, ამინდის პროგნოზსა და მუსიკას გადაცემდა. ჩრდილო კორეამ სამხრეთ კორეას გარკვეული დრო მისცა მათ გასათიშად. წინააღმდეგ შემთხვევაში, როგორც BBC იტყობინება, მათზე იერიშის მისატანად ჩრდილო კორეას სამხედრო ტექნიკა უკვე მობილიზებული ჰქონდა.
მას შემდეგ, რაც ორმა ქვეყანამ ერთმანეთს ცეცხლი გაუხსნა, სახელმწიფო მედიის ინფორმაციით, ჩრდილო კორეამ „ნახევრად საომარი მდგომარეობა გამოაცხადა".
სასაზღვრო ტერიტორიებიდან სამხრეთ კორეამ 4 000-მდე მოსახლის ევაკუაცია მოახდინა და განაცხადა, რომ თავდასხმის შემთხვევაში, საპასუხო ზომები ძლიერი იქნებოდა.
