უკრაინის პრეზიდენტის ოფიციალურ ვებგვერდზე ოდესის გუბერნატორის, მიხეილ სააკაშვილის გადაყენების შესახებ პეტიცია გამოჩნდა.

პეტიციის ტექსტში აღნიშნულია, რომ სააკაშვილმა სამთვიანი გუბერნატორობის განმავლობაში ვერ შეძლო ვერც ერთი პირობის შესრულება.

„ოდესის მცხოვრებლებმა ვერ დაინახეს რეალური რეფორმები - სააკაშვილის ყველა რეფორმა მხოლოდ სიტყვებად რჩება. ის კორუფციას მხოლოდ ტელევიზიებისათვის მიცემულ ინტერვიუებში ებრძვის“, - ნათქვამია პეტიციაში.

გარდა ამისა, დოკუმენტში წერია, რომ რეგიონში ინვესტორების მოზიდვის შესახებ გუბერნატორის დაპირების მიუხედავად, არც ერთი ინვესტორი ოლქში არ გამოჩენილა. 

„მოვუწოდებთ უკრაინის პრეზიდენტს, გადააყენოს სააკაშვილი თანამდებობიდან. ექსპერიმენტმა არ გაამართლა. დროა, ეს გულწრფელად ვაღიაროთ", - ნათქვამია პეტიციაში. 

პეტიციას ამ დროისათვის 60-მდე ხელმომწერი ჰყავს. იმისათვის, რომ ხელისუფლებამ აღნიშნული ინიციატივა განიხილოს, საჭიროა 25 000 ხელმოწერის შეგროვება.