რუსეთმა სირიის ტერიტორია კასპიის ზღვიდან დაბომბა. რუსეთის ხელისუფლების განმარტებით, ისინი თავს „ისლამური სახელმწიფოს“ ექსტრემისტულ დაჯგუფებებს დაესხნენ, - წერს BBC.
ვლადიმერ პუტინთან შეხვედრისას რუსეთის თავდაცვის მინისტრმა განაცხადა, რომ ოთხმა სარაკეტო გემმა 11 სამიზნე ობიექტი გაანადგურა. პუტინმა ტერორისტებზე წარმატებული თავდასხმა კარგი მომზადებით ახსნა.
„ვიცით, რამდენად რთულია ანტიტერორისტული სახის ოპერაციები. რა თქმა უნდა, შეჯამება ნაადრევია, მაგრამ რაც აქამდე გაკეთებულა, ნამდვილად იმსახურებს საუკეთესო შეფასებას“, - განაცხადა რუსეთის პრეზიდენტმა.
რუსეთის გენშტაბში ასევე იუწყებიან, რომ თავდასხმა „ისლამისტურ სახელმწიფოზე“ შეთანხმებული იყო სირიის ოპერაციაში ჩართულ პარტიორებთან.
BBC-ს შეფასებით, უცნობია, რომელ პარტნიორებზეა საუბარი. პენტაგონის ხელმძღვანელი ეშტონ კარტერი აცხადებს, რომ აშშ სირიაში სამხედრო ოპერაციებთან დაკავშირებით რუსეთთან თანამშრომლობას მანამ არ აპირებს, სანამ მოსკოვი სტრატეგიას არ შეიცვლის.
რუსეთის ქმედებებს მან შეცდომა უწოდა და განაცხადა, რომ NATO და აშშ არ აპირებენ რუსეთისთვის სადაზვერვო ინფორმაციის მიწოდებას, სანამ რუსეთი არ შეწყვეტს სირიის პრეზიდენტ ბაშარ ასადის მხარდაჭერას.
