იუსტიციის მინისტრ თეა წულუკიანის განცხადებით, ჰააგის პროკურორთან შეხვედრაზე განსაკუთრებული ყურადღება დაეთმო აგვისტოს ომის დროს დაზარალებულების უსაფრთხოების საკითხს.  

„ჩვენ ბევრი ვისაუბრეთ ჰააგის პროკურორთან იმის შესახებ, თუ როგორ დავიცვათ ჩვენი მოწმეები და დაზარალებულები, რადგან არის  შემთხვევები, როდესაც ჰააგის პროკურატურას დაუწყია გამოძიება და შემდეგ, შიშის ფაქტორის გამო, მოწმეს ან დაზარალებულს გადაუთქვამს ჩვენება. ჩვენ ვისაუბრეთ და შევჯერდით, რომ ერთობლივი ძალებით დავიცავთ დაზარალებულებსა და მოწმეებს“, − განაცხადა იუსტიციის მინისტრმა.

თეა წულუკიანმა აგვისტოს ომის მსხვერპლთ და მოწმეებს მოუწოდა, დროულად, 30 დღის ვადაში, მიმართონ ჰააგის სასამართლოს შესაბამის უწყებას − მსხვერპლთა დაცვის სამსახურს.

„თქვენ გაქვთ 30-დღიანი ვადა. ამას ითვალისწინებს პროცედურა, რომ მიმართოთ  ჰააგის სასამართლოს შესაბამის სამსახურს, რომელსაც მსხვერპლთა დაცვის სამსახური ჰქვია. კონტაქტები დღეიდან გამოქვეყნდება იუსტიციის სამინისტროს ვებგვერდზე. მსხვერპლებს შეგიძლიათ, მიმართოთ ჰააგის სასამართლოს მსხვერპლთა დაცვის ოფისს როგორც უშუალოდ, პირდაპირ, ისე  ადვოკატის მეშვეობით; მიმართოთ მათ, მხარი დაუჭირონ ჰააგის პროკურორის შეამდგომლობას ეთნიკური წმენდის გამოძიების შესახებ და მოითხოვოთ, რომ დაიკითხოთ მომავალი კვირიდან იმ პირების მიერ, რომლებიც დაიწყებენ ჩამოსვლას მსხვერპლებთან შესახვედრად“, − განაცხადა წულუკიანმა.

მისივე თქმით, იუსტიციის სამინისტროს მსხვერპლისა და ჰააგის პროკურორის ურთიერთობაში პროცედურული როლი არ აქვს, ამიტომ ყველა დაზარალებულმა და მოწმემ უშუალოდ უნდა მიმართოს ჰააგის პროკურორის შესაბამის სამსახურს.