„არაოფიციალური სტატისტიკით, დღეს საქართველოს მართლმადიდებელი ეკლესიის დაქვემდებარებაში 90-მდე ბავშვთა სახლია, სადაც 17 918 ბავშვი სწავლობს. მათგან 856 პანსიონატურ მომსახურებას იღებს, 525 კი - ცალკე ბავშვთა სახლშია განთავსებული“, - ამის შესახებ ევროპასთან ინტეგრაციისა და საგარეო ურთიერთობების კომიტეტების გაერთიანებულ სხდომაზე ორგანიზაცია „პარტნიორობა ადამიანის უფლებებისთვის“ წარმომადგენელმა, ანა აბაშიძემ განაცხადა.

მისი თქმით, ეკლესიის დაქვემდებარებაში არსებული ბავშვთა სახლების შესანარჩუნებლად 2016 წლის სახელმწიფო ბიუჯეტში 1 მლნ ლარია გათვალისწინებული.

აბაშიძის თქმით, 24 სკოლა-პანსიონი სამუფთოს დაქვემდებარებაშია.

„დახურვის ნაცვლად, სახელმწიფო ხელს უწყობს ასეთი ბავშვთა სახლების შენარჩუნებას. სახელმწიფო ამისთვის კონკრეტულ ინსტიტუტებს აძლევს ფულს ჩვენი ხელფასებიდან, როცა ეს ჩვენი სურვილი ნამდვილად არ არის“, - თქვა აბაშიძემ.

აბაშიძემ სხდომაზე ქუჩაში მცხოვრები და მომუშავე ბავშვების პრობლემა, ასევე სკოლამდელი აღზრდის სამართლებრივი ნორმების არარსებობის საკითხები წამოჭრა. დეპუტატებს, რომლებმაც ამ თვალსაზრისით პრობლემების არსებობა აღიარეს, საპატრიარქოსა თუ სამუფთოს დაქვემდებარებაში მყოფი ბავშვთა სახლების შესახებ კომენტარი არ გაუკეთებიათ.