ქვეყანაში მიმდინარე პროცესებთან დაკავშირებით, საქართველოს პრეზიდენტი ამ წუთებში ავლაბრის რეზიდენციაში მედიის წარმომადგენლებს ხვდება.
შეხვედრაში მონაწილეობენ ჟურნალისტები ინგა გრიგოლია, ეკა მიშველაძე, ნინო ჯანგირაშვილი.
პრეზიდენტის ადმინისტრაციის თქმით, მარგველაშვილი ქვეყანაში სამოქალაქო მშვიდობის შენარჩუნების მიზნით დღეს კონსულტაციებს გეგმავს ასევე დიპლომატიურ კორპუსსა და არასამთავრობო სექტორთან.
საქართველოს პრეზიდენტი გიორგი მარგველაშვილი „რუსთავი 2-ის" გარშემო მიმდინარე პროცესებს საგანგებო ბრიფინგით გამოეხმაურა.
პრეზიდენტის შეფასებით, მთავრობის მეთაურის დღევანდელმა გამოსვლამ ვითარების განმუხტვის ნაცვლად მეტი დაძაბულობა მოიტანა.
პრეზიდენტმა მოსამართლეს მოუწოდა, ნაჩქარევი და ხისტი გადაწყვეტილება არ მიიღოს.
„გავუფრთხილდეთ სამოქალაქო მშვიდობას. მოვუწოდებთ მოსამართლეს, არ მიიღოს ნაჩქარევი და ხისტი გადაწყვეტილება. არსებული ვითარებიდან გამომდინარე, ვიწყებ კონსულტაციებს პოლიტიკურ პარტიებთან, არასამთავრობო ორგანიზაციებსა და დიპლომატიურ კორპუსთან, რომ შევინარჩუნოთ კონსტიტუციური წესრიგი", - აცხადებს პრეზიდენტი.
