„რუსთავი 2-ის” შენობასთან სამაუწყებლო კომპანიის მხარდამჭერებმა კარვები გაშალეს, წყალი და საწოლები უკვე მოიმარაგეს და ამბობენ, რომ თუ საჭირო იქნება, ღამეს იქვე გაათენებენ.

ტელეკომპანიის ეზოში პოლიტიკოსები, ჟურნალისტები, არასამთავრობო ორგანიზაციის წევრებიც იმყოფებიან.

ჟურნალ „National Geographic საქართველოს" რედაქტორი ლევან ბუთხუზი ამბობს, რომ ტელეკომპანიის გარშემო არსებული პროცესები სამართლიანი და გამჭვირვალე რომ ყოფილიყო, საზოგადოებას ასეთი პროტესტი არ გაუჩნდებოდა:

„როცა საქმე ეხება მედიას და სიტყვის თავისუფლებას, მნიშვნელოვანია, მოქალაქეებმა ვიცოდეთ, რამდენად სამართლიანად მიმდინარეობს საქმე. საზოგადოებას უამრავი კითხვის ნიშანი აქვს, ამიტომ უკეთესია, მათ პასუხი გაეცეს, რომ შეუქევადი არ გახდეს დღეს არსებული პროცესები”.

აქციაზე სააკაშვილის საპრეზიდენტო ბიბლიოთეკის ხელმძღვანელი ანდრო ბარნოვიც იმყოფებოდა. მისი განმარტებით, საზოგადოება დღეს ორ ნაწილადაა გაყოფილი:

„ერთ ნაწილს დავარქმევდი მე „შპანას”, მეორე ნაწილი კი საზოგადოებაა, თავისი მრავალფეროვანი შეხედულებებით. საზოგადოების ეს ნაწილი თანხმდება, რომ „შპანა” არ უნდა იყოს ხელისუფლებაში. საქართველოს არ ჰყავს ხელისუფლება, ესენი არ არიან პოლიტიკოსები. ჩვენ დიდი შეცდომა დავუშვით მათი ხელისუფლებაში მოყვანით, ეს შეცდომა არ უნდა დაგვეშვა, მაგრამ ახლა უნდა გამოვასწოროთ. სამწუხაროდ, სასამართლო სისტემაც ასეთივე დაბალი დონისაა, მოსამართლეები ემორჩილებიან ხელისუფლებას და მათ არ აწუხებთ სამოქალაქო ღირსება და შეგნება, რომ ყველაფრის მიუხედავად დაიცვან საზოგადოება”, - ამბობს ანდრო ბარნოვი.