C ჰეპატიტის მართვის სახელმწიფო პროგრამა საქართველოში 2015 წლის აპრილიდან დაიწყო. პროგრამის ფარგლებში, პაციენტებს საშუალება აქვთ მკურნალობა პრეპარატ „სოფუსბუვირით“ ჩაიტარონ. ამ დროისთვის C ჰეპატიტის მართვის პროგრამის პირველი ეტაპი იწურება, რის მიხედვითაც პროგრამაში 5 000 პაციენტი უნდა ჩაერთოს, ისინი, ვისი ჯანმრთელობის მდგომარეობაც ყველაზე კრიტიკული იყო. (პროგრამის პირველ ეტაპზე მკურნალობაში ერთვებიან ღვიძლის მე-3 და მე-4 ხარისხის დაზიანების პაციენტები).
პროგრამაში ჩართვის კრიტერიუმებიდან გამომდინარე, იმისათვის, რომ პაციენტები C ჰეპატიტის მართვის სახელმწიფო პროგრამაში ჩაერთონ, სხვადასხვა ტიპის სადიაგნოსტიკო ანალიზები უნდა გაიკეთონ; პასუხების მიღების შემდეგ სადიაგნოსტიკო ანალიზებთან ერთად ყველა სხვა საჭირო დოკუმენტაცია სოციალური მომსხურების სააგენტოში წარადგინოს და დარეგისტრირდეს, როგორც მკურნალობის მსურველი.
დარეგისტრირებული პაციენტის დოკუმენტაციას განიხილავს შესაბამისი კომისია, რომელიც გადაწყვეტს, აკმაყოფილებს თუ არა პაციენტის ჯანმრთელობის მდგომარეობა პროგრამაში ჩართვის კრიტერიუმებს.
როგორც „ლიბერალთან“ საუბრისას პროგრამის ბენეფიციარები აღნიშნავენ, C ჰეპატიტის მართვის სახელმწიფო პროგრამისადმი პაციენტების უკმაყოფილება სწორედ აღნიშნული კომისიების შეკრების ვადებს ეხება.
მათი თქმით, კომისია თვეში ერთხელ იკრიბება, რაც საკმარისი არაა, რადგან პაციენტის მდგომარეობა შესაძლოა ისეთი მძიმე იყოს, რომ მისთვის ყოველი დღე გადამწყვეტი აღმოჩნდეს.
„მე მაქვს მეოთხე ხარისხის ფიბროზი, ეს ძალიან რთული სტადიაა, განცხადება სააგენტოში ივნისში შევიტანე, თუმცა, როცა მივაკითხე გასარკვევად, როდის უნდა დამეწყო მკურნალობა, მითხრეს, რომ კომისიის სხდომა არ შემდგარა.
მიმაჩნია, როდესაც ადამიანს ჯანმრთელობის ასეთი რთული მდგომარეობა აქვს, ყოველ დღეს გადამწყვეტი მნიშვნელობა აქვს, რადგან ყოველ წუთში შესაძლოა ღვიძლის უკმარისობა განვითარდეს. მოგვიანებით მკურნალობაში კი ჩავერთე, მაგრამ კომისიის შეკრების ლოდინში, ფაქტობრივად, ერთი თვე დავკარგე“, - აცხადებს „ლიბერალთან“ საუბრისას C ჰეპატიტის მართვის სახელმწიფო პროგრამის ბენეფიციარი, რომლის ვინაობას, მისივე თხოვნით, არ ვამხელთ.
პაციენტის თქმით, სასურველია, რომ კომისია თვეში ორჯერ მაინც შეიკრიბოს, რადგან ყოველ დღეს „ჩემნაირი ადამიანებისთვის სასიცოცხლო მნიშვნელობა აქვს“.
„ლიბერალი" დაინტერესდა, რამდენი სხდომა გამართაა კომისიამ შექმნის დღიდან. ჯანდაცვის სამინისტროს ინფორმაციით, კომისიის პირველი სხდომა 7 მაისს გაიმართა. შემდეგი სხდომების თარიღები კი ასეთია: 21 მაისი, 9 ივნისი, 1 ივლისი, 17 ივლისი, 7 აგვისტო, 17 სექტემბერი, 8 ოქტომბერი და 2 ნოემბერი.
ჯანდაცვის მინისტრის მოადგილე ვალერი კვარაცხელია ამ კუთხით პაციენტების შენიშვნებს არ იზიარებს და იმ მიზეზებზე საუბრობს, რის გამოც ამ ეტაპზე კომისიის შეკრება უფრო ხშირად ვერ ხერხდება.
მისი თქმით, კომისიის შეკრებას ერთი თვე არავინ ელოდება, საამისოდ „დაახლოებით ორკვირიანი პერიოდია, რაც ტექნიკური პროცესებისთვისაა საჭირო“.
როგორც კვარაცხელია განმარტავს, კომისიის შეკრება პრობლემა არაა, შესაძლოა ის თვეში 4-ჯერაც შეიკრიბოს, თუმცა პროგრამა ამ ეტაპზე, ჯერჯერობით, ამის საშუალებას არ იძლევა.
„პაციენტს რომ მოაქვს თავისი დოკუმენტები, მას ჰგონია, რომ ამით ყველაფერი დასრულდა და მეორე დღესვე უნდა ჩერთოს პროგრამაში, ასე არაა. პროგრამაში ჩართვას მოსამზადებელი სამუშაოები სჭირდება, რაც დროსთან არის დაკავშირებული.
საბუთების მიღების შემდეგ პროგრამაში შესაყვანია ლაბორატორიული დასკვნა, ანალიზები, მონაცემები, შემდეგ ხდება ასევე კოდირება. მხოლოდ ამ პროცედურების შემდეგ შეუძლია კომისიას, განიხილოს პაციენტის საქმე.
პროგრამაში ხარვეზები იყო და ვასწორებთ, ჩამოსულები არიან IT სპეციალისტები, გარკვეული პერიოდის შემდეგ, თუ ამ ინფორმაციების შეყვანა დაჩქარდება, მაშინ კომისიის სხდომების რაოდენობაც გაიზრდება“, - ამბობს კვარაცხელია.
როგორც მინისტრის მოადგილე აღნიშნავს, თუ პროგრამის ოპტიმიზაციას შეძლებენ, კომისიის შეკრების ვადა, შესაძლოა 1 კვირამდე შემცირდეს, რაც, მისი თქმით, იდეალური ვარიანტი იქნება.
როგორც კვარაცხელია განმარტავს, პირველ ეტაპზე საუბარი იყო პროგრამაში 5000 პაციენტის ჩართვაზე, სამომავლოდ კი სამინისტრო 20 000 პაციენტის მკურნალობისთვის უნდა მოემზადოს, რაც ნიშნავს იმას, რომ კომისიების შეკრების ვადები აუცილებლად უნდა დაჩქარდეს.
მისი თქმით, ამ ეპატზე მკურნალობაში 4 500 პაციენტი უკვე ჩართულია და როგორც ვარაუდობდნენ, ნოემბრის ბოლოსთვის პროგრამა 5000 პაციენტს მოიცავს.
