„უკან მიმაქვს ჩემი სიტყვები რეესტრის პასუხისმგებლობასთან დაკავშირებით" - ნიკა გვარამიას თქმით, დოკუმენტი, რომლითაც „რუსთავი 2-ის“ დროებითმა მმართველებმა უფლებამოსილება ზაალ უდუმაშვილს გადასცეს, რეესტრში არ არის დარეგისტრირებული.
მისი განმარტებით, იგი დროებითი მმართველების განცხადებებს დაეყრდნო და ამის საფუძველზე განაცხადა, რომ საჯარო რეესტრმა უკანონოდ დაარეგისტრირა დვალისა და საყევარიშვილის დოკუმენტაცია. მისივე თქმით, დროის სიმცირის გამო, ვერ მოხერხდა გადამოწმება, რეგისტრირებული იყო თუ არა ეს ყველაფერი.
„რუსთავი 2-ის“ დროებითმა მმართველებმა დღეს პრესკონფერენციაზე აღნიშნეს, რომ „რუსთავი 2-ის“ მართვის ყველა უფლებამოსილება ზაალ უდუმაშვილს გადასცეს. მათი თქმით, შესაბამისი დოკუმენტაცია ნოტარიუსმა დაამოწმა და საჯარო რეესტრში უკვე რეგისტრირებულია. დროებითი მმართველების პრესკონფერენციის შემდეგ ნიკა გვარამია აცხადებდა, რომ ზაალ უდუმაშვილს დოკუმენტისთვის ხელი არ მოუწერია, რის გამოც იგი რეესტრის მიმართ გამოძიების დაწყებას მოითხოვდა.
უდუმაშვილმა მოგვიანებით განმარტა, რომ დავით დვალისთვის დროებით მმართველად მისი დანიშვნის შესახებ თანხმობა არ მიუცია.
