„რუსთავი 2-ის" გენერალური დირექტორი, რომელსაც საქალაქო სასამართლოს სამოქალაქო საქმეთა კოლეგიის  გადაწყვეტილებით უფლებამოსილება აღუდგა, ამბობს, რომ დროებითი მმართველების უფლებამოსილების შეჩერება ხრიკია, რომელიც საკონსტიტუციო სასამართლოს შეცდომაში შეყვანას ისახავს მიზნად.

„მათთვის მნიშვნელოვანია, საკონსტიტუციო სასამართლოზე გაჟღერდეს, რომ უკვე აღარ არის ზიანის საფრთხე. უნდათ სასამართლოს დაუსაბუთონ, რომ ნორმები აღარ შეჩერდეს, რადგან პრობლემა ამოწურულია. პრობლემა ამოწურული არ არის. ამ განჩნებით, დვალი საერთოდ განარიდეს პროცესებს და დატოვეს საყევარიშვილი, რომელსაც არანაკლები საფუძველი აქვს, იყოს მიკერძოებული. ჩვენი მთავარი კონკურენტის წარმომადგენელია. რამდენიმე დღით ადრე გადადგა და დღემდე ხედავენ „იმედის" შენობაში, რას ნიშნავს იმას, რომ იცოდა ასეთი განჩინება იქნებოდა" - ამბობს გვარამია.

მისი თქმით, სასამართლოს ეს გადაწყვეტილება არაფერს ნიშნავს, რადგან „ეს განჩინება ურთმელიძესთან საჩივრდება, რომელმაც შესაძლოა რომ ახალი განჩინება გამოიტანოს და თქვას, რომ ხალვაშის შუამდგომლობა დასაბუთებულია - ხელახლა შემოიყვანოს დროებითი მმართველები".