„ევრაზიის თანამშრომლობის ფონდის" მიერ გამოქვეყნებული საზოგადოებრივი აზრის კვლევის წინასწარი მონაცემების თანახმად,  მოსახლეობის 19% ფიქრობს, რომ ევროკავშირი საფრთხეს შეუქმნის ქართულ ტრადიციებს. 14% კი საერთოდ არ ეთანხმება ამ მოსაზრებას.

 2013 წლის მონაცემებთან  შედარებით იმ ადამიანთა პროცენტული მაჩვენებელი, ვინც ეთანხმება აღნიშნულ პოზიციას, გაზრდილია 11%-ით, ხოლო მათი რაოდენობა, ვინც ფიქრობს, რომ ევროკავშირი არ შეუქმნის საფრთხეს ქართულ ტრადიციებს შემცირებულია 4%-ით.

რაც შეეხება შედარებით პასუხებს,  27% უფრო მეტად  ეთანხმება მოსაზრებას, რომ ევროკავშირი საფრთხეს უქმნის ქართულ ტრადიციებს, ვიდრე არ ეთანხმება;  21% კი უფრო არ ეთანხმება.

გამოკითხულთა 19%-ს არ აქვს პოზიცია ამ მოსაზრებასთნ დაკავშირებით და პასუხობს „არ ვიცი“, ხოლო უარი პასუხზე არ დაფიქსირებულა.

ევრაზიის თანამშრომლობის ფონდი აქვეყნებს ევროკავშირის მიმართ მოსახლეობის დამოკიდებულებისა და ცოდნის 2015 წლის საზოგადოებრივი აზრის გამოკითხვის შედეგებს.

გამოკითხვის საფუძველზე მომზადებულ ანგარიშს ფონდი საზოგადოებას ნოემბრის ბოლოს წარუდგენს. ანგარიში მიმოიხილავს 2015 წლის გამოკითხვისა და ბოლო 7 წლის ძირითად ტენდენციებს. საკითხისადმი საზოგადოების დიდი ინტერესის გამო, ფონდი გამოკითხვის პირველად მონაცემებს ასაჯაროებს. 

კვლევა მოეწყო შვედეთის საერთაშორისო განვითარებისა და თანამშრომლობის სააგენტოსა და საქართველოში ნიდერლანდების გაერთიანებული სამეფოს საელჩოს მხარდაჭერით. გამოკითხვა „სი-არ-არ-სი საქართველომ“ ჩაატარა .