ბელგიის სამეფოში საქართველოს საელჩო ბელგიაში მცხოვრებ საქართველოს მოქალაქეებს თხოვნით მიმართავს, გაითვალისწინონ ბელგიის ხელისუფლების რეკომენდაციები.

შესაბამისი მიმართვა ევროკავშირთან საქართველოს მისიისა და ბელგიის სამეფოსა და ლუქსემბურგის დიდ საჰერცოგოში საქართველოს საელჩოს ვებგვერდზე გავრცელდა.

„როგორც მოგეხსნებათ, ბელგიის ხელისუფლების გადაწყვეტილებით, ბრიუსელში შენარჩუნებულია ტერორისტული საფრთხის უმაღლესი, მე-4 დონე, ბელგიის დანარჩენ ტერიტორიაზე კი მე-3 დონის საფრთხე. ბელგიის ხელისუფლებამ გადაწყვეტილება კრიზისების ცენტრის რეკომენდაციის საფუძველზე მიიღო. საქართველოს მოქალაქეებს ვთხოვთ, გაითვალისწინონ ბელგიის ხელისუფლების შემდეგი რეკომნდაციები: გთხოვთ, თავი აარიდოთ ხალხმრავალ ადგილებს; შეზღუდოთ, მაქსიმალურად ქალაქში გადაადგილება, თუ ამას გადაუდებელი აუცილებლობა არ მოითხოვს; იყავით ინფორმირებულნი სანდო მედია საშუალებების ინფორმაციით; თავი შეიკავოთ, საზოგადოებრივი ტრანსპორტის გამოყენებისგან; თქვენს საცხოვრებელ კომუნაში დაწესებული კონკრეტული შეზღუდვების შესახებ ინფორმაცია მიიღოთ, თქვენს კომუნაში ან კომუნის ოფიციალურ ვებ-გვერდზე. ბელგიის ხელისუფლება შეზღუდვების მოხსნის ან გახანგრძლივების შესახებ გადაწყვეტილებას მიიღებს კრიზისების ცენტრის რეკომენდაციის საფუძველზე.

ბელგიის კრიზისების ცენტრში გახსნილია ცხელი ხაზი 1771, სადაც შეგიძლიათ მიიღოთ დამატებითი ინფორმაცია მე-4 დონის საფრთხით გათვალისწინებული უსაფრთხოების ზომების შესახებ. ასევე შეგიძლიათ ეწვიოთ კრიზისების ცენტრის ვებ-გვერდს: http://centredecrise.be/fr/news/gestion-de-crise/suites-des-attentats-paris-recommandations-maintenues-pour-la-population

საჭიროების შემთხვევაში, მოგვმართეთ ბელგიის სამეფოში საქართველოს საკონსულო სამსახურს, შემდეგ ნომრებზე: +32 4777 000 34 / +32 470 2442 62", - ნათქვამია ინფორმაციაში.