"ვფიქრობ, რომ პატრიარქს უნდა ჰქონდეს უფლება, შეიწყალოს პატიმრები და ბრალდებულები. ამაზე ვისაუბრეთ პრემიერ-მინისტრთან და ალბათ პრემიერი დააყენებს ამ საკითხს",- ამის შესახებ სრულიად საქართველოს კათალიკოს-პატრიარქმა ილია მეორემ რუსთაველის თეატრში განაცხადა.
დღეს ქალთა #5 დაწესებულების მსჯავრდებულებმა რუსთაველის თეატრში სპექტაკლი "ჩემი მძევალი ანგელოზები" დადგეს. მას საქართველოს პრემიერი ირაკლი ღარიბაშვილი და სასჯელაღსრულების მინისტრი კახი კახიშვილიც ესწრებოდნენ.
პატრიარქის ინიციატივას დაეთანხმა კახიშვილი და განაცხადა, რომ ილია მეორეს ამის უფლება უნდა ჰქონდეს.
"მეც მიმაჩნია, რომ პატრიარქს უნდა ჰქონდეს ეს უფლება. ერის წინამძღვარია. მასზე ბრძენი ადამიანი არ ვიცი ვინ არის, ამიტომ ნამდვილად უნდა ჰქონდეს მას შეწყალების უფლება", - განაცხადა კახა კახიშვილმა.
პრემიერს აღნიშნულთან დაკავშირებით კომენტარი არ გაუკეთებია.
საქართველოს კონსტიტუციის 73-ე მუხლის "პ" ქვეპუნქტის თანახმად, მსჯავრდებულთა შეწყალება პრეზიდენტის ექსკლუზიური უფლებაა.
