რუსეთთან ურთიერთობის საკითხში პრემიერ-მინისტრის სპეციალური წარმომადგენლის, ზურაბ აბაშიძის თქმით, საქართველომ სოლიდურად მშვიდად, ამავე დროს პრინციპულად უნდა გააგრძელოს ამჟამინდელი საგარეო კურსი. აბაშიძეს იმედი აქვს, მომავალ წელს კიდევ უფრო მეტი ხელშესახები შედეგები იქნება.
„გუშინ მოვისმინეთ, რომ რუსეთის მხარე აპირებს, მნიშვნელოვნად გაამარტივოს სავიზო რეჟიმი. ვცდილობთ, რუსეთთანაც ჩვენი ურთიერთობები ჩიხიდან გამოვიყვანოთ და ამის რაღაც პატარა ნიშნები უკვე არის", - ამბობს აბაშიძე.
როგორც აბაშიძე ამბობს, საქართველოს რუსეთთან დიპლომატიური ურთიერთობა არ აქვს და, ჯერჯერობით, ეს საკითხი დღის წესრიგში არ დგას, „ჩვენმა რუსმა კოლეგებმაც კარგად იციან, რატომ".
„ეს დაკავშირებულია, ტერიტორიული მთლიანობის, სუვერენიტეტის პრინციპებთან და, სანამ არ მოხდება სერიოზული გარღვევა ამ მიმართულებნით, რა თქმა უნდა, ეს საკითხი, დღის წესრიგში არ დადგება. რა თქმა უნდა, თუ იქნება მნიშვნელოვანი წინაგადადგული ნაბიჯები, ამ თვალსაზრისით, ამ საკითხის განხილვაც იქნება შესაძლებელი, მაგრამ არა ახლა", - აცხადებს ზურაბ აბაშიძე.
აბაშიძე რუსეთთან სავიზო რეჟიმის შესაძლო გამარტივების მნიშვნელობაზეც საუბრობს.
„თითქმის ყოველდღიურად ვაწყდები სერიოზულ სირთულეებს. უამრავი ადამიანი მიკავშირდება, ისინი, ვისაც მოსკოვში წასვლა სჭირდება, იქ უამრავი ჩვენი თანამემამულე ცხოვრობს, ჰყავთ ნათესავები, მეგობრები ახლობლები, ჩვენს ბიზნესმენებს სჭირდებათ რუსეთში წასვლა და ეს ძალიან სერიოზულ სირთულეებთანაა დაკავშირებული. თუკი ეს სირთულეები მოიხსნება, ამას მოსახლეობის ეს ნაწილი იგრძნობს, და ზოგადად, ჩვენი ხელისუფლების პრინციპია, მაქსიმალურად შეუწყოს ხელი ჩვენი მოქალაქეების თავისუფალ გადაადგილებას, ნებისმიერი მიმართულებით. ახლა ევროკავშირთან გვექნება სეთი სერიოზული გარღვევა, თუ მომავალში აშშ-თანაც მივაღწევთ, რაღაც ანალოგიურს, ესეც ძალიან დიდი წინსვლა იქნება. მინდა ჩვენს თანამემამულეებს ჰქონდეთ მაქსიმალური თავისუფლება ამ თვალსაზრისით", - თქვა აბაშიძემ.
