„თუ პრემიერი გიორგი კვირიკაშვილი იქნება, მინდა, წარმატება ვუსურვო. მე მხოლოდ და მხოლოდ გამიხარდება, მაგრამ რამდენად შეძლებს, რეალურად მართოს მთავრობა?" - ასე აფასებს ფრაქცია „თავისუფალი დემოკრატების" წევრი ვიქტორ დოლიძე გიორგი კვირიკაშვილის კანდიდატურის პრემიერ-მინისტრის თანამდებობაზე შესაძლო წარდგენას.
როგორც დოლიძე ამბობს, მას კვირიკაშვილისგან კარგის გარდა არაფერი ახსოვს, თუმცა შიშობს, ისიც იმავე პრობლემებს არ შეეჯახოს, რომელთა წინაშეც ყოფილი პრემიერი, ირაკლი ღარიბაშვილი აღმოჩნდა.
„მინდა ვუსურვო წარმატებები მხოლოდ და მხოლოდ, მაგრამ რამდენად შეძლებს გიორგი ამას, მე არ ვარ დარწმუნებული. იმავე პრობლემებს არ შეეჯახოს, რომელთა წინაშეც ღარიბაშვილი აღმოჩნდა. გიორგი შეძლებს, რეალურად მართოს მთავრობა? შეძლებს, რომ რეალურად მართოს კაბინეტი სხვების ჩარევის გარეშე? დანარჩენი, ვფიქრობ გიორგი ძალიან ზომიერი, კარგი ეკონომისტი და პროფესიონალია. რომელმაც შეიძლება ეს პოსტი უკეთესობისკენ გამოიყენოს. მე მხოლოდ და მხოლოდ გამიხარდება გიორგის გამარჯვება. ვინც უნდა იყოს შემადგენლობაში, იქნება თითოეული ჩვენგანის გამარჯვება. მე იპოზიციაში ვარ, მაგრამ მინდა ვუსურვო წარმატება, რადგან ეს ეხება ჩვენს თანამოქალაქეებს", - ამბობს დოლიძე 2030-თან საუბარში.
დოლიძემ ირაკლი ღარიბაშვილის საქმიანობაც შეაფასა და აღნიშნა, რომ ბევრი რამ გაკეთდა, თუმცა სისტემური ცვლილებები არ მომხდარა. ვიქტორ დოლიძის თქმით, მას ღარიბაშვილთან „ადამიანური, მეგობრული ურთიერთობები" აქვს, თუმცა მან მოლოდინი ვერ გაამართლა.
„დადებით მომენტებზე რომ ბევრი ვისაუბრო, ალბათ, არ იქნებოდა სწორი, რადგან მე თვითონ არ მაქვს იმის განცდა, რომ დადებითი ბევრი მოხდა. განსაკუთრებით ისეთ თემებთან დაკავშირებით, როგორებიც არის ეკონომიკური განვითარება, ინვესტიციების შემოდინება ქვეყანაში, სოციალური ფონი და ა.შ. მიუხედავად იმისა, რომ უამრავი რამე გაკეთდა, მაგალითად, სოფლის მეურნეობა და ჯანდაცვის თემები, სოციალური მიზნებისთვის ბევრი თანხაც გამოიყო და ეს აიღო ხელისუფლებამ თავის თავზე, ეს არ არის სისტემური გამოსწორება ვითარების", - თქვა დოლიძემ.
