იაპონიასა და სამხრეთ კორეას შორის ისტორიული შეთანხმება გაფორმდა. ქვეყნებს შორის სადავო საკითხი მეორე მსოფლიო ომის დროს იაპონურ ბორდელებში ქალთა იძულებით მუშაობას ეხება.
იაპონია სამხრეთ კორეას ბოდიშს უხდის და კომპენსაციის სახით 1 მილიარდ იენს სთავაზობს.
სამხრეთ კორეა კომპენსაციას წლების განმავლობაში მოითხოვდა. 1965 წელს დაწყებული განხილვების შემდეგ შეთანხმებას იაპონიის საგარეო საქმეთა მინისტრის ფუმიო კიშიდას სეულში ვიზიტის შემდეგ მიაღწიეს. სამხრეთ კორეელ კოლეგასთან შეხვედრის შემდეგ კიშიდამ განაცხადა, რომ პრემიერ-მინისტრმა შინზო აბემ მათ გულწრფელად მოუხადა ბოდიში.
„აბე, როგორც იაპონიის პრემიერ-მინისტრი, გიხდით ბოდიშს და იზიარებს ყველას ტკივილს და ნაიარევს, რომლებიც იმ მოვლენების შედეგად მიიღეთ ფიზიკურადაც და მენტალურადაც, რომელთა დავიწყება და განკურნება ძალიან რთულია“, - განაცხადა კიშიდამ.
მეორე მსოფლიო ომის პერიოდში 200 000-მდე ქალი გახდა იძულებითი პროსტიტუციის მსხვერპლი. ე.წ. სექსმონები იაპონელ ჯარისკაცებს ემსახურებოდნენ. ამ ქალებიდან უმეტესობა სამხრეთ კორეელი იყო და ამჟამად მხოლოდ 46 მათგანია ცოცხალი.
დანარჩენი ქალები ჩინეთიდან, ფილიპინებიდან, ინდონეზიიდან და ტაივანიდან იყვნენ.
იაპონიამ მეორე მსოფლიო ომის დროინდელ სექსმონობაზე პასუხისმგებლობა პირველად 1993 წელს აღიარა, თუმცა კომპენსაციის გადახდის წინააღმდეგები იყვნენ, რადგან მიაჩნდათ, რომ ორ ქვეყანას შორის ეს საკითხი 1965 წელს დიპლომატიური ურთიერთობების აღდგენით მოგვარდა.
წყარო: BBC