რუსეთისთვის ეკონომიკის კუთხით გასული წელი ბოლო ათწლეულის განმავლობაში ყველაზე მძიმე იყო, - ამის შესახებ რუსეთის პრემიერ-მინისტრმა დმიტრი მედვედევმა მოსკოვში გაიდარის სახელობის ფორუმზე განაცხადა.

„ჩვენი ეკონომიკა დიდი ხანია არ შეჯახებია ისეთ მძლავრ და ამავდროულად სინქრონულ გამოწვევებს, როგორიცაა ნავთობის ფასის მკვეთრი ვარდნა, სანქციები და მსოფლიო ეკონომიკის პარადიგმის ცვლილებები“, - განაცხადა მედვედევმა.

რუსეთის პრემიერმა ისაუბრა ეკონომიკური ზრდისთვის საჭირო წყაროებსა და ექსპორტის შედეგად მიღებული შემოსავლის უკმარისობაზე. მისი თქმით, 2015 წელს წარმოების მაჩვენებელი, საქმიანი და საინვესტიციო აქტივობებიც შემცირდა.

ყველაზე დიდი დარტყმა კი, მედვედევის თქმით, რუსეთის მოსახლეობის შემოსავლებს მიადგა, რის შედეგადაც საშუალო კლასი ბევრად უფრო გაღარიბდა.

რუსეთის პრემიერი მიიჩნევს, რომ ქვეყნის ეკონომიკის მდგომარეობა რთულია, თუმცა მოგვარებას ექვემდებარება. მისი თქმით, სანქციების პირობებშიც კი რუსეთის ეკონომიკა სტაბილური რჩება.

წყარო: BBC, РосБизнесКонсалтинг