განათლებისა და მეცნიერების მინისტრის მოადგილის, ლია გიგაურის განცხადებით, გაიზარდა იმ სკოლების რაოდენობა, სადაც გრიპის ვირუსის პრევენციის გამო, სასწავლო პროცესი შეჩერებულია, თუმცა, მისივე თქმით, ეს არ არის საგანგაშო რაოდენობა.

რაც შეეხება დიდთოვლობის გამო, რეგიონებში სასწავლო პროცესის შეჩერებას, გიგაურის განცხადებით, აქ პოზიტიური დინამიკაა და 4 სკოლაში, ქედის რაიონში დღეს უკვე აღდგენილია სასწავლო პროცესი. 

„სხვა რაიონებში დამატებით მსგავსი პრობლემები არ გამოვლენილა, ამიტომ მეტეოროლოგიური პირობების გამო, 204 სკოლის ნაცვლად რეგიონებში დღეს სასწავლო პროცესი შეჩერებული იქნება 200 სკოლაში", - განაცხადა გიგაურმა. 

მისივე თქმით, სწავლის პროცესი მინისტრის ბრძანებით, დასახელებულ სკოლებში 3 დღით შეჩერდა. თუ როდის მოხდება აღდგენა, ლია გიგაურის განმარტებით, ეს სკოლამ უნდა გადაწყვიტოს, შაბათი დღეების ხარჯზე. 

როგორც ლია გიგაურმა აღნიშნა, დიდთოვლობის გამო, 204 სკოლაში იყო სწავლის პროცესი შეჩერებული, მათგან 4 სკოლაში პროცესი განახლდა, ხოლო მოსწავლეთა გაცდენების მაჩვენებლის 20%-ზე მეტი რაოდენობის გამო სწავლის პროცესი შეწყვეტილი იყო 180 სკოლაში და დღეის მონაცემებით მას კიდევ 15 სკოლა დაემატა.