„ქართული ოცნების“ აღმასრულებელი მდივნის, ირაკლი კობახიძის თქმით, გარდაბნის გამგებლის რიგგარეშე არჩევნებში, მე-4 საარჩევნო უბანზე ერთმანეთს „ერთიანი ნაციონალური მოძრაობის“ კოორდინატორები დაუპირისპირდნენ.
კობახიძე „ტაბულასთან" საუბარში ამბობს, რომ არჩევნები, ძირითადად, მშვიდ ვითარებაში მიმდინარეობს და მნიშვნელოვან დარღვევებზე ინფორმაცია არ აქვთ.
გარდაბნის გამგებლის რიგგარეშე არჩევნებზე, მე-4 საარჩევნო უბანზე დაპირისპირება მოხდა.
„ერთიანი ნაციონალური მოძრაობის" წევრი სერგო რატიანი ამბობს, რომ მოქალაქეთა ჯგუფს არჩევნების ჩაშლის მცდელობა ჰქონდა.
„დადის ჯგუფი და აწყობს პროვოკაციებს. წინა არჩევნებში ორივე უბანზე ჩვენ გვაქვს მოგებული და როგორც ჩანს, აქვთ დავალება, რომ ჩაშალონ არჩევნები. სრულიად ცხადია, რომ მოდიან და შლიან. მეექვსე უბანზეც იყვნენ და მცდელობა ჰქონდათ, ჩაეშალათ პროცესი, თავს დასხმოდნენ ჩვენს მხარდამჭერებს" - ამბობს რატიანი.
დღეს გარდაბნის მუნიციპალიტეტის გამგებლის რიგგარეშე არჩევნები მიმდინარეობს. ცესკოში კენჭისყრის პროცესის შესახებ პირველი საინფორმაციო ბრიფინგი გაიმართა.
„საარჩევნო უბნები ამომრჩევლისთვის დილის 8:00 სთ-დან გაიხსნა, ხმის მიცემის პროცესი მშვიდ და ყველასათვის ხელმისაწვდომ გარემოში მიმდინარეობს,“ - ნათქვამია ცესკოს განცხადებაში.
