„მოგვწონს ვინმეს, თუ არ მოგვწონს, ჰქონდა თუ არა მას შეცდომები, ამ ქვეყნის დამოუკიდებლობის სოლისტი, მედროშე, არის ზვიად გამსახურდია“, - „ქართული ოცნება - ეროვნული ფორუმის“ წევრმა და პარლამენტის ვიცე-სპიკერმა, გუბაზ სანიკიძემ პარლამენტში პრეზიდენტის ყოველწლიური მოხსენების შემდეგ სიტყვით გამოსვლისას აღნიშნა, რომ მარგველაშვილს ზვიად გამსახურდიას ხსენება გამორჩა.
„თქვენ, როცა სიტყვით გამოდიოდით, ახსენეთ საქართველოს დამოუკიდებლობა, თავისუფლება. ამასთან დაკავშირებით, თქვენ ახსენეთ 2 ისტორიული პიროვნება, ორი მოღვაწე, ნოე ჟორდანია და ზურაბ ჟვანია. არ ვიტყვი იმას, რომ თქვენ შეგნებულად გამოგრჩათ ზვიად გამსახურდია. მოკლე მეხსიერებამ ჩვენ ბევრჯერ წაგვაგებინა. ზვიად გამსახურდია არ არის ის პერსონა, რომელიც ჩვენ სასწრაფოდ უნდა გადავივიწყოთ. აბსოლუტური და უნივერსალური პიროვნებები ისტორიამ არ იცის. არსებობს უნივერსალური იდეები“, - მიმართა პრეზიდენტს გუბაზ სანიკიძემ.
მისი თქმით, ეს არაა შენიშვნა და უბრალოდ შეხსენებაა.
„1000 წლის შემდეგ ქართველ ბავშვს რომ ჰკითხონ, ვინ მოუტანა საქართველოს დამოუკიდებლობა, ისინი იტყვიან, რომ ეს ზვიად გამსახურდია იყო“, - განაცხადა გუბაზ სანიკიძემ.
