„მეგონა, რომ ის უკვე აღარ იყო პარლამენტის წევრი, რადგან, ყველას გვახსოვს, მან ეს განცხადება ერთხელ უკვე გააკეთა“, - გოგი თოფაძის მიერ გუშინ პარლამენტის ტრიბუნიდან პრეზიდენტთან დაკავშირებით გაკეთებულ განცხადებას თავდაცვის მინისტრი ეხმაურება.
თინა ხიდაშელმა შეფასება დღეს მთავრობის სხდომაზე გააკეთა.
„აბსოლუტურად გაუგებარი იყო ის განცხადებები, რომელიც მისგან გუშინ პარლამენტის ტრიბუნიდან მოვისმინეთ. ბოდიშის მოხდა ისეთი თემაა, რომელსაც ვერავის დაავალდებულებ. ადამიანს ან გაქვს განცდა, რომ ბოდიში გაქვს მოსახდელი, ან არა“, - აღნიშნა თინა ხიდაშელმა.
ფრაქცია „ქართული ოცნება - მრეწველების" თავმჯდომარემ, გოგი თოფაძემ პრეზიდენტ გიორგი მარგველაშვილს პარლამენტის ტრიბუნიდან მიმართა.
„თქვენ ხართ პირველი პირი საქართველოში, თქვენი ყველა წინადადება, სიტყვა, ყველა ბგერა ანალიზდება. მინდა, მოგახსენოთ თქვენ თქვენი გამონათქვამები, ქართველ ხალხზე, ქართველ ერზე. ქართველი ხალხი თქვენ დაუნებს შეადარეთ, ძალიან სამწუხაროა, რომ თქვენ ასე აფასებთ საქართველოს მოქალაქეებს, მაშინ, არც პრეზიდენტობა უნდა გეკადრათ, საქართველოსი", - თქვა გოგი თოფაძემ.
„ლიბერალის“ რედაქცია გოგი თოფაძის განცხადებას დისკრიმინაციულად მიიჩნევს და ემიჯნება მას.
