პროკურატურის ადამიანის უფლებათა სამმართველოს უფროსის, მაია კვირიკაშვილის განცხადებით, 2013 წლის 17 მაისის საქმეზე სასამართლოს გამამართლებელი განაჩენი პროკურატურამ სააპელაციო სასამართლოში გაასაჩივრა.

„თქვენ იცით, რომ ჩვენ თავის დროზე დევნა დავიწყეთ 5 პირის მიმართ. 1 პირის მიმართ სასამართლომ დევნა შეწყვიტა. არასაპატიმრო აღკვეთის ღონისძიება გამოიყენა 4 პირის მიმართ,  რომელთაც ბრალად ედებოდათ პირთა შეკრებისა და მანიფესტაციის უფლების ხელყოფა. თუმცა, საქმე იყო ძალიან ვრცელი. თუ არ ვცდები, 100-ზე მეტი მოწმე დაიკითხა განხილვის დროს, თუმცა სასამართლომ გამამართლებელი განაჩენი.  ჩვენ სააპელაციოში გასაჩივრებული გვაქვს ეს გადაწყვეტილება და დაველოდებით შედეგებს“ - თქვა მაია კვირიკაშვილმა.

2015 წლის 23 ოქტომბერს, საქმის ორწლიანი განხილვის შემდეგ, თბილისის საქალაქო სასამართლომ მიიღო გადაწყვეტილება, რომლითაც 2013 წლის 17 მაისს აქციის დარბევის გამო ბრალდებული სასულიერო პირი მამა იოთამი (ირაკლი ბასილაია) და მასთან ერთად კიდევ რამდენიმე პირი  (ბექა სალუქვაძე, ტარიელ დავრიშიანი და გიორგი ბასიაშვილი) გაამართლა. აღნიშნულ პირებს ბრალი ედებოდათ სისხლის სამართლის კოდექსის 161-ე მუხლით, რაც გულისხმობს „შეკრების ან მანიფესტაციის მოწყობის ანდა მასში მონაწილეობის უფლების განხორციელებისათვის უკანონოდ ხელის შეშლას ძალადობით, ძალადობის მუქარით ან სამსახურებრივი მდგომარეობის გამოყენებით.