საქართველოს მთავარმა პროკურატურამ ტელეკომპანია „იბერიის“ დახურვისა და სამაუწყებლი ლიცენზიის იძულებით ჩამორთმევის საქმეზე სს პასუხისგებაში მისცა საქართველოს ყოფილი გენერალური პროკურორი, ზურაბ ადეიშვილი და გენერალური პროკურორის ყოფილი პირველი მოადგილე, გიორგი ლაცაბიძე.
„გამოძიების შედეგად დადგენილია, რომ 2004 წლის იანვარში საქართველოს ახლად არჩეული ხელისუფლების წარმომადგენლებმა, მათ შორის გენერალურმა პროკურორმა, ზურაბ ადეიშვილმა გადაწყვიტეს, ხელში ჩაეგდოთ „ომეგა ჯგუფის“ კუთვნილი ტელეკომპანია „იბერია ტვ-ს“ სამაუწყებლო ლიცენზია, რათა ტელევიზია ხელისუფლების მიერ ყოფილიყო კონტროლირებადი. ამ მიზნით, შემუშავებულ იქნა დანაშაულებრივი გეგმა, რომლის განხორციელებაც საქართველოს გენერალურმა პროკურორმა ზურაბ ადეიშვილმა და მისმა მოადგილემ გიორგი ლაცაბიძემ ითავეს“ - ნათქვამია პროკურატურის განცხადებაში.
ზურაბ ადეიშვილს და მის მოადგილეს გიორგი ლაცაბიძეს ბრალდება საქართველოს სისხლის სამართლის კოდექსის 333-ე მუხლით წარედგინათ, რაც სამსახურებრივი უფლებამოსილების გადამეტებას გულისხმობს.
