უკრაინის ყოფილი პრემიერ-მინისტრის იულია ტიმოშენკოს პარტია „ბატკივშინა“ მმართველ კოალიციას გამოეყო. კოალიციის დატოვების მიზეზი გახდა არსენი იაცენუკის პრემიერ-მინისტრად დარჩენა.

ტიმოშენკომ გამოყოფა ერთადერთ სწორ გადაწყვეტილებად დაასახელა და სხვა საპარლამენტო ფრაქციებსაც კოალიციიის დატოვებისკენ მოუწოდა. მანამდე „ბატკივშინამ“ განაცხადა, რომ ახალგაზრდობისა და სპორტის მინისტრი, რომელიც მათი პარტიის წევრია, მინისტრთა-კაბინეტიდან გაიწვიეს.

ტიმოშენკოს თქმით, სამშაბათს მთავრობის გადაყენების კენჭისყრის ჩავარდნის შემდეგ გამოჩნდა, რომ კოალიცია, ფაქტობრივად, არ არსებობს.

სამშაბათს არსენი იაცენუკის მთავრობისთვის უნდობლობის გამოცხადებასთან დაკავშირებით უკრაინის უმაღლესმა რადამ კენჭისყრა გამართა. სხდომაზე რეზოლუციამ ხმების საკმარისი რაოდენობა ვერ მოაგროვა.

მთავრობის გადაყენებას „ბატკივშინას“, „პეტრო პოროშენკოს ბლოკის“, „სამოპომოშჩისა“ და „რადიკალური პარტიის“ დეპუტატებმა დაუჭირეს მხარი. წინააღმდეგი იყო იაცენუკის „სახალხო ფრონტი“, „ოპოზიციური ბლოკი“ და „ვოზროჟდენიე“.

რეზოლუცია პრეზიდენტის ფრაქციის, „პეტრო პოროშენკოს ბლოკის“ ლიდერმა, იური ლუცენკომ შეიტანა. მანამდე არსენი იაცენუკის ანგარიშის მოსმენის შემდეგ უკრაინის პარლამენტმა მთავრობის მუშაობა არადამაკმაყოფილებლად მიიჩნია.

წყარო: BBC