იტალიელი მწერალი და ფილოსოფოსი უმბერტო ეკო, განსაკუთრებით ცნობილი რომანისათვის „ვარდის სახელი“, 84 წლის ასაკში გარდაიცვალა.

მისი ოჯახის ინფორმაციით, ის პარასკევს ღამით საკუთარ სახლში გარდაიცვალა.

მისი რომანი „ვარდის სახელი“ 1989 წელს ფილმად გადაიღეს, რომელშიც მთავარი როლი შონ კონერმა შეასრულა.

„ფუკოს ქანქარას“, „პრაღის სასაფლაოს“, „გუშინდელი დღის კუნძულის“, „ბაუდოლინოს“ და „დედოფალ ლოანას საიდუმლო ვნებანის“ ავტორი წერას არ წყვეტდა. მან გასულ წელს ახალი რომანი - „ნომერი ნული“ გამოსცა.

„წიგნები ყოველთვის წიგნებზე ყვებიან და ყოველი ამბავი მოგვითხრობს  ამბავს, რომელიც უკვე მონათხრობია“, - ეკო ხშირად აღნიშნავდა, რომ ის ფილოსოფოსი იყო, - „რომანებს მხოლოდ დასვენების დღეებში ვწერ“.

მწერლობის გარდა ის უნივერსიტეტებშიც მოღვაწეობდა. 1980 წელს ეკომ სან მარინოს უნივერსიტეტში კომუნიკაციების დეპარტამენტი დააარსა. ბოლო წლებში კი საპატიო პროფესორი და ჰუმანიტარული მეცნიერებების უმაღლესი სკოლის თავმჯდომარე იყო ბოლონიის უნივერსიტეტში.

უმბერტო ეკო 1932 წელს ჩრდილოეთ იტალიაში, ალესანდრიაში დაიბადა.