პროკურატურამ საგარეჯოს შუალედური არჩევნების საქმეზე გამოძიება დაიწყო. პროკურატურის პრესსამსახურში „ლიბერალს" განუცხადეს, რომ გამოძიება სისხლის სამართლის კოდექსის 332 მუხლის პირველი ნაწილით მიმდინარეობს, რაც სამსახურებრივი მოვალეობის ბოროტად გამოყენებას ითვალისწინებს.

საგარეჯოს მაჟორიტარი დეპუტატის, ფრაქცია „ქართული ოცნება - რესპუბლიკელების" წევრის, თამარ ხიდაშელის განმარტებით, გამოსაძიებელი არაფერია.

„სპეციალური უბნის შექმნის მიზანშეწონილობაზე ორი ინსტანციის სასამართლომ იმსჯელა. თავის დროზე ეს ირმა ინაშვილმა გაასაჩივრა და ორივე ინსტანციის სასამართლომ მიიჩნია, რომ სპეცუბანი შეიქმნა კანონის მოთხოვნათა სრული დაცვით. შემდეგ ამ სპეცუბნის ხმების გადათვლა მოხდა საოლქო კომისიაში და ესეც ორჯერ გასაჩივრდა ორი ინსტანციის სასამართლოში, ამიტომ ვფიქრობ, რომ აქედან გამოსაძიებელი ნამდვილად არაფერია, მაგრამ თუ ვინმე ფიქრობს, რომ ეს საკმარისი არ არის და გამოძიება კიდევ აუცილებელია, არც ამის საწინააღმდეგო გვაქვს არაფერი“, - განაცხადა თამარ ხიდაშელმა.