სს "მინის" ქარხნის მუშებმა გაფიცვა შეწყვიტეს. შეთანხმება კომპანიასა და საგაფიცვო კომიტეტს შორის, დღეს, გაფიცვის 30-ე დღეს შედგა. მოთხოვნილი ხელფასის 30%-იანი ზრდის ნაცვლად კომპანიამ მუშებს 7,5%-ით მომატებული ანაზღაურება შესთავაზა. ასევე, დააკმაყოფილა მათი მოთხოვნა პროფკავშირისთვის გამოყოფილ ფართთან დაკავშირებით. კოლექტიური ხელშეკრულების გაფორმებაზე კი მუშაობა აპრილიდან დაიწყება და ძალაში შევა 2017 წლის პირველი იანვრიდან. შეხვედრას ესწრებოდნენ ჯანდაცვის სამინისტროს წარმომადგენელი პაატა ჟორჟოლიანი, რეგიონის მაჟორიტარი დეპუტატი დიმიტრი ხუნდაძე და გაერთიანებული პროფკავშირის წარმომადგენელი თამაზ დოლაბერიძე. შეხვედრა დასრულებამდე დატოვა პროფკავშირების გაერთიანების ხელმძღვანელმა ირაკლი პეტრიაშვილმა.
ქსანში, სააქციო საზოგადოება „მინის“ 170-მდე თანამშრომელი დაახლოებით 1 თვის წინ გაიფიცა. გაფიცულებს სამი მოთხოვნა ჰქონდათ: ხელფასის 30%-ით მომატება, კოლექტიური ხელშეკრულების გაფორმების უფლების მიცემა ადგილობრივ და დარგობრივ პროფკავშირებთან და ადგილობრივი პროფკავშირებისთვის საწარმოს ტერიტორიაზე საოფისე ფართის გამოყოფა.
ფოტო: ხატია მაღლაფერიძე