ერეკლე დეისაძის ადვოკატის, თორნიკე უსტარაშვილის ინფორმაციით, პოლიციამ დეისაძე სისხლის სამართლის კოდექსის 255-ე მუხლის დარღვევის ბრალდებით დააკავა. როგორც მან "ლიბერალს" განუცხადა, ამჟამად დეისაძე ორთაჭალაში ჰყავთ გადაყვანილი და მანქანაში ამყოფებენ, რადგან დაკავებულთა სიმრავლის გამო შენობაში ჯერ ვერ შეჰყავთ.
უსტარაშვილის თქმით, მან, როგორც ერეკლე დეისაძის ინტერესების დამცველმა, დაკავებულთან შეხვედრა მოითხოვა. თუმცა პოლიციისგან, გაურკვეველი მიზეზის გამო, უარი მიიღო.
სისხლის სამართლის კოდექსის 255-ე მუხლი პორნოგრაფიული ნაწარმოების ან სხვა საგნის უკანონოდ დამზადებას ან გასაღებას გულისხმობს და ისჯება ჯარიმით ან გამასწორებელი სამუშაოთი ვადით ორ წლამდე ან თავისუფლების აღკვეთით იმავე ვადით.
ერეკლე დეისაძე კანცელარიასთან გამართული პერფორმანსის დროს დააკავეს. მისი ადვოკატის ინფორმაციით, მან კანცელარიის შენობაზე პროექტორის მეშვეობით გასპარ ნოეს ფილმი გაუშვა.
ფოტო: ლექსო მაჭავარიანი
