თსუ-ში შეკრებილმა სტუდენტებმა იურიდიული ფაკულტეტის დეკანისგან, ირაკლი ბურდულისგან, ამავე ფაკულტეტის ასისტენტ-პროფესორის გიორგი რუსიაშვილის განცხადების შესახებ განმარტება მოითხოვეს. 

რუსიაშვილმა Facebook-ის პირად გვერდზე სტუდენტებს მიმართა: 

„იურიდიული ფაკულტეტის სტუდენტების საყურადღებოდ, ვისაც ჩემი საგანი გაქვთ არჩეული და მიგაჩნიათ, რომ დეკანი სამარცხვინოა, თამამად შეგიძლიათ თავი აღარ შეიწუხოთ ლექციებზე დასწრებით და საგამოცდო ნაწერზე მიუთითოთ "სამამარცხვინო დეკანი" ან უბრალოდ ს. დ. გარანტირებულად გექნებათ 100 ქულა, რათა ხელი აღარ შეგეშალოთ სხვა არასამარცხვინო იურიდიულ ფაკულტეტზე გადასვლაში".

ბურდულმა სტუდენტებს უთხრა, რომ ნებისმიერ პირს აქვს უფლება, თავისუფლად გამოხატოს თავისი აზრი, რასაც სტუდენტების პროტესტი მოჰყვა.

თსუ-ის რექტორის ლადო პაპავას შეფასებით, აღნიშნული განცხადება ყოვლად მიუღებელია. „თუ ასეთი რამ არის, მოგვმართეთ და აუცილებლად მივიღებთ ადეკვატურ ზომებს", - განაცხადა ლადო პაპავამ, - „ვინც არ უნდა იყოს, ასისტენტი იქნება თუ სრული პროფესორი, არავის მხრიდან არ შეიძლება ისეთი დამოკიდებულება, რომელიც სტუდენტის ღირსებას შეურაცხყოფს. ჩემი პრინციპული პოზიციაა, რომ ჩვენ გვაქვს წესდება, ამის ჩარჩოდან არ გამოვალთ, ეს ფაქტი ოფიციალურად შემოვიდეს და მივცემთ შიდა გამოძიებისთვის". 

ვიდეო: ნათია ამირანაშვილი