უნივერსიტეტში თვითმმართველობის წარმომადგენლებს, რექტორს, განათლების სამინისტროსა და აუდიტორია 115-ის წარმომადგენლებს შორის შეთანხმება ვერ შედგა. 
რექტორის, განათლების მინისტრის მოადგილისა და თვითმმართველობის წევრების შეხვედრა სულ ცოტა ხნის წინ უშედეგოდ დასრულდა. 

შეხვედრიდან გამოსული რექტორის თქმით, მისი პოზიცია უცვლელია, რომ უნივერსიტეტის ინტერესებიდან გამომდინარე, არ აპირებს გადადგომას. 

„მიზანი იყო მოსმენა, აზრების გაცვლა, ჩემი პოზიცია ურყევია, როგორც ვთვლიდი, რომ უნივერსიტეტის ინტერესებიდან გამომდინარე, რექტორი არ შეიძლება გადადგეს, ასე ვფიქრობ. კონსულტაციები და შეხვედრები გაგრძელდება. ხვალაც ვაპირებთ კომუნიკაციის გაგრძელებას. მათ მოისმინეს ყველაფერი. მე დავპირდი, რომ ყველა დაცული იქნება უნივერსიტეტში, ეს მათი საერთო სახლია. არავისზე ზეწოლა არ იქნება, დანარჩენი მათი გადასაწყვეტია. ჩემი პოზიცია ურყევია“, - განაცხადა ლადო პაპავამ. 

ვიდეო: ნათია ამირანაშვილი

რექტორმა და მინისტრის მოადგილემ თვითმმართველობის წევრებს შეხვედრაზე ის მოთხოვნები გააცნეს, რომლებზეც აუდიტორია 115-ის წარმომადგენლებთან შეთანხმდნენ. 

მოთხოვნები შემდეგი იყო: 

1. თუ ის ხალხი, რომელიც ჩვენ შეურაცხყოფას გვაყენებდა, გავა უნივერსიტეტიდან, ჩვენც მზად ვართ წამოვიდეთ კომპრომისზე და აღვადგინოთ სასწავლო პროცესი უნივერსიტეტში.

2. სამინისტრო დაგვეხმაროს, რომ თვითმმართველობის არჩევნები ჩატარდეს სრულიად განსხვავებული პრიცნიპით - პრივილეგიებისგან რომ გავანტავისუფლოთ უნივერსიტეტი.

3. პირობა, რომ ერთ კვირაში ისევ შევიკრიბებით აქ და ვიმსჯელებთ კონკრეტულ საკითხებზე, ისევე როგორც შემდეგ სამშაბათს და ა.შ

აუდიტორია 115-ის წევრები პირობას დებდნენ, რომ გვიან ღამით, მას შემდეგ რაც მემორანდუმს მიიღებდნენ,იმ შემთხვევაში თუ თვითთმართველობის ორგანიზებული აქციის მონაწილეებიც დატოვებენ უნივერსიტეტს, აუდიტორიას დაასუფთავებდნენ და დაიშლებოდნენ. 

უნივერსიტეტის თვითმმართველობის პრეზიდენტი შალვა საბაური კი ამბობს, რომ თვითმმართველობის წევრები რჩებიან შენობაში სანამ რექტორი არ გადადგება და ამ მოთხოვნის შესრულებამდე ის თავად აგრძელებს შიმშილობას:

ვიდეო: დათო ფარულავა 

 „ერთი საკითხი, რაზეც ვერ შევთანხმდით, არის რექტორის წასვლა, დანარჩენი, სტუდენტობასთან მე მგონია, რომ ყველაფერზე საერთო პოზიციები გაგვაჩნია და ვთანხმდებით. მზად ვართ ლოგიკური კომპრომისებისთვის, და თუკი მათ რაიმე სახის ხარვეზის შეგრძნება აქვთ სტრუქტურაში, შეგვიძლია ვიმუშაოთ როგორც საკანონმდებლო ცვლილებებისთვის, ისე შიგნიდან მოწესრიგებაზე. ამ პოზიციაზე ვთანხმდებით, რომ ჩვენ სტუდენტებთან გასაყოფი არაფერი არ გვაქვს.

ერთადერთი პრეტენზია გვაქვს რექტორთან, რომელიც 3 წლის განმავლობაში „ოდეერს" მალავდა და ვერ უზრუნველყო ინსტიტუციების მწყობრად მუშაობა. რექტორი არ უნდა იყოს არც პროფესურის და არც სტუდენტების დასაცავი. და არც საპატრულო პოლიცია არ უნდა გამოიძახოს სტუდენტების წინააღმდეგ.

ჩვენ ვრჩებით აქ, ვაგრძელებთ მშვიდობიან დემონსტრაციას. რექტორის კაბინეტში არა, აქეთ მხარეს გადმოვინაცვლეთ, ჩვენ მშვიდობიანი საპროტესტო აქცია გვაქვს და არავისზე ძალადობას არ ვაპირებთ. მე ვშიმშილობ, მაგრამ დანარჩენებს ვთხოვე, რომ პოზიციის დასაფიქსირებლად ერთი ადამიანიც კმარა, და არაა საჭირო ვინმეს ჯანმრთელობას ზიანი მიადგეს", - უთხრა შეხვედრის დასრულების შემდეგ „ლიბერალს" შალვა საბაურმა.