„ქართული ოცნების“ მოსვლიდან ერთი წლის თავზე ხალხი „გაბლატავდა“, - ფრაქცია „ქართული ოცნების“ თავმჯდომარის მოადგილე სოსო ჯაჭვლიანი ტელეკომპანია „იბერიის“ ეთერში მთავრობის დადებით მხარეებზე საუბრობს და ამბობს, რომ გამოხატვის თავისუფლებამ საგრძნობლად იმატა. 

ამის მაგალითად ჯაჭვლიანმა 2012 წლის არჩევნებამდე რამდენიმე კვირით ადრე სატელევიზიო გამოკითხვა გაიხსენა, რომლის მიხედვითაც პარლამენტარებს სთხოვდნენ დაესახელებინათ მიხეილ სააკაშვილის ნაკლი. ჯაჭლიანი იხსენებს რომ გამოკითხულები ან ამბობდნენ, რომ სააკაშვილს ნაკლი არ ჰქონდა, ან იმალებოდნენ.

წამყვანის შეკითხვას კი, დაესახელებინა ბიძინა ივანიშვილის ნაკლი, ჯაჭვლიანმა თავი აარიდა.

„მე გეტყვით პლუსებს. ზუსტად ერთი წლის თავზე „ქართული ოცნების“ მოსვლიდან ხალხი „გაბლატავდა“, მართლა „გაბლატავდა“. კარგი გაგებით ვიძახი. აი ესაა ზუსტად „ქართული ოცნებისა“ და კოალიციის დადებითი, რომ ხალხს მიეცა აზრის გამოხატვის საშუალება“, - განაცხადა მან.