„გაიგოს ყველამ, რომ საქართველოს უსაფრთხოება გადის დასავლელ პარტნიორებთან თანამშრომლობაზე”, - განაცხადა პრემიერ-მინისტრმა, გიორგი კვირიკაშვილმა საფინანსო-საბიუჯეტო კომიტეტის თავმჯდომარის, თამაზ მეჭიაურის განცხადების პასუხად.
მისივე თქმით, ქვეყნის საერთაშორისო კურსი უცვლელია.
„ყველანაირი ვაი-ვიში, რაც არის ატეხილი, არის აბსოლუტურად უადგილო და ემსახურება მხოლოდ თავის დამკვიდრებას. ამიტომ მე მოვუწოდებდი ყველა იმ ადამიანს, ვინც აბსოლუტურად უაზრო ვაი-ვიში ატეხა ამ საკითხის გარშემო, შეხედოს ქვეყნის მიერ მიღებულ გადაწყვეტილებს, ქვეყნის საერთაშორისო კურსს. ამ საკითხში არანაირი გადახვევა არ არსებობს. გაიგოს ყველამ, რომ საქართველოს უსაფრთხოება გადის დასავლელ პარტნიორებთან თანამშრომლობაზე”, - განაცხადა გიორგი კვირიკაშვილმა ჟურნალისტებთან საუბრისას.
პრემიერი მიიჩნევს, რომ წინასაარჩევნო პერიოდში სტრატეგიულ ხაზს აცილებული განცხადებები გასაკვირი არ არის. მისივე შეფასებით, მთავარია ის, რომ ქვეყნის საგარეო კურსთან დაკავშირებით კითხვები არ გაჩნდეს.
„დღეს ჩვენ გვაქვს სრულიად სხვა წინაასარჩევნო გარემო და ამ გარემოში, გარდამავალ პერიოდში სხვადასხვა განცხადება, რომელიც გენერალურ ხაზს და სტრატეგიულ ხაზს არის აცილებული, ჩვეულებრივი მოვლენაა. მთავარია ის, როგორი იქნება საქართველოს განვითარების ვექტორი, ამ კუთხით საქართველოში შეკითხვები არ არსებობს, ეს არის ყველაზე მნიშვნელოვანი“ - აღნიშნა გიორგი კვირიკაშვილმა.
