სტუდენტური მოძრაობა "აუდიტორია 115"-ის წევრის გიორგი არობელიძის თქმით, მოძრაობის ერთ-ერთ წევრს თსუ-ის სტუდენტური თვითმმართველობის წევრებმა სცემეს.
"დაახლოებით 5 წუთის წინ ვნახე დაცვის ოთახში ვიდეო ჩანაწერი, სადაც ჩანს აუდიტორიის წევრი ცოტნე ცხვედიანი, რომელიც უნივერსიტეტის პირველი კორპუსის დერეფანში გადაადგილდება. მას გვერდს ჩაუვლის სტუდენტური თვითმმართველობის ყოფილი ვიცე-პრეზიდენტი პაატა ბახტურიძე. აშკარად ჩანს, რომ ის რაღაცას მიაძახებს ცხვედიანს, რის შემდეგაც იგი ბრუნდება და ცხვედიანს საყელოზე ჰკიდებს ხელს. შემდეგ დაიწყო ჩხუბი, დერეფანში გამოჩნდა დაახლოებით 20-მდე ადამიანი და ფიზიკურად გაუსწორდნენ "აუდიტორია 115"-ის სტუდენტს",- უთხრა გიორგი არობელიძემ "ლიბერალს".
ლიბერალის კორესპონდენტთან საუბრისას ცოტნე ცხვედიანმა დაუდასტურა რომ დაპირისპირებაში თვითმმართველობის ყოფილი ვიცე-პრეზიდენტი პაატა ბახტურიძეც მონაწილეობდა.
დაცვის სამსახურის ცნობით, მობილიზებული იყო საპატრულო პოლიციის ორი ეკიპაჟი, რომლებმაც ოქმი შეადგინეს.