პარლამენტმა ნარკოტესტირებასთან დაკავშირებულ დეპუტატ გოგა ხაჩიძის საკანონმდებლო ინიციატივას მხარი არ დაუჭირა. კანონპროექტს მხარდასაჭერად 9 ხმა დააკლდა.
კანონპროექტის მიხედვით, იმ შემთხვევაში თუ პირი უარს განაცხადებს ნატკოტესტირებაზე, შემდეგ მისი არანებაყოფლობითი ნარკოლოგიური შემოწმება მხოლოდ სასამართლო განჩინების საფუძველზე გახდება შესაძლებელი.
კანონპროექტის განმარტებითი ბარათის მიხედვით, თუ პოლიციელს ექნება დასაბუთებული ვარაუდი, რომ პირმა ექიმის დანიშნულების გარეშე მოიხმარა ნარკოტიკული ნივთიერება, იგი უფლებამოსილი იქნება, დააკავოს იგი.
თუ დაკავების შემდეგ პირი ნარკოტესტირებაზე თანახმა იქნება, იგი გამოკვლევისთვის უფლებამოსილ პირს წარედგინება, ხოლო იმ შემთხვევაში, თუ არ იქნება თანახმა - „პოლიციელი შეადგენს ადმინისტრაციულ სამართალდარღვევათა შესახებ ოქმს და დაუყოვნებლივ წარუდგენს სასამართლოს".
კანონპროექტით, იმ შემთხვევაში, თუ მოსამართლე მიიჩნევს, რომ პირის მიერ ნარკოტიკული ნივთიერების ექიმის დანიშნულების გარეშე მოხმარების შესახებ ვარაუდი დასაბუთებულია, მას უფლება ექნება, გამოიტანოს განჩინება არანებაყოფლობითი გამოკვლევის შესახებ.
„პოლიციელის მიერ სამართალდამრღვევის არანებაყოფლობითი გამოკვლევისთვის უფლებამოსილ პირთან წარდგენა მხოლოდ სასამართლოს განჩინების საფუძველზე იქნება შესაძლებელი", - ვკითხულობთ კანონპროექტის განმარტებით ბარათში.
ხოლო, იმ შემთხვევაში, თუ მოსამართლე მიიჩნევს, რომ დაუსაბუთებელია ვარაუდი, რომ პირმა ნარკოტიკული ნივთიერება მოიხმარა ექიმის დანიშნულების გარეშე, იგი უფლებამოსილი იქნება შეწყვიტოს ადმინისტრაციული სამართალდარღვევის საქმის წარმოება და გაათავისუფლოს დაკავებული.
