სისხლის სამართლის კოდექსსა და საარჩევნო კანონდებლობაში დაგეგმილ ცვლილებებს, რომლითაც საარჩევნო უბანზე ან მის მიმდებარე ტერიტორიაზე მომხდარი ძალადობის ფაქტები მკაცრდება, იურიდიულ და ადამიანის უფლებათა დაცვის კომიტეტები დღეს განიხილავენ.
აღნიშნული საკანონდებლო ცვლილებები საქართველოს მთავრობის ინიცირებულია. პროექტის ავტორი იუსტიციის სამინისტროა.
სისხლის სამართლის კოდექსში დაგეგმილი ცვლილებების მიხედვით, საარჩევნო უბანზე, საარჩევნო კომისიის განთავსების ადგილსა და მათ მიმდებარე ტერიტორიაზე, წინასაარჩევნო აგიტაციისა და წინასაარჩევნო კამპანიის ღონისძიების დროს ფიზიკური ძალადობისა და მუქარა დაისჯება ჯარიმით ან/და თავისუფლების აღკვეთით 2 წლამდე. იმ შემთხვევაში, თუკი მსგავსი ქმედება ჩადენილია ჯგუფურად, ან გამოიწვია ჯანმრთელობის განზრახ მსუბუქი დაზიანება დაისჯება თავისუფლების აღკვეთით 2-დან 5 წლამდე.
ინიცირებული ცვლილებების მიხედვით, პოლიციელებს საარჩევნო უბნის შენობის მიმდებარე ტერიტორიაზე ყოფნის უფლება ეძლევათ. პოლიციის გამოძახება შეეძლება საარჩევნო კომისიის თავმჯდომარეს იმ შემთხვევაში, თუ კენჭისყრის შენობაში ან მის მიმდებარე ტერიტორიაზე საფრთხე ექმნება კენჭისყრის ჩატარებას, ან საზოგადოებრივ წესრიგს.
„საარჩევნო კოდექსს“ შეიძლება დაემატოს ახალი ცვლილება, რომლის მიხედვითაც, გამონაკლის შემთხვევაში, კენჭისყრის მიმდებარე ტერიტორიაზე ყოფნის უფლება პოლიციელებს საარჩევნო კომისიის თავმჯდომარის მოთხოვნისა და თანხმობის გარეშეც შეეძლებათ, თუკი ეს აუცილებელი იქნება საზოგადოებრივი წესრიგის დაცვის მიზნით.
ავტორთა განცხადებით, კანონპროექტის მიზანია წინასაარჩევნო კამპანიისა და არჩევნების მიმდინარეობისას ძალადობის პრევენცია.
