პრეზიდენტის პრესსამსახურის ინფორმაციით, უშიშროების საბჭოს დღევანდელ სხდომას პრემიერ-მინისტრი გიორგი კვირიკაშვილი, პარლამენტის თავმჯდომარე დავით უსუფაშვილი, შეიარაღებული ძალების გაერთიანებული შტაბის უფროსი ვახტანგ კაპანაძე, სახელმწიფო უსაფრთხოების სამსახურის უფროსი ვახტანგ გომელაური, შს მინისტრი გიორგი მღებრიშვილი, უშიშროების საბჭოს მდივანი ირინა იმერლიშვილი და საქართველოს პრეზიდენტი გიორგი მარგველაშვილი დაესწრებიან.
უშიშროების საბჭოს სხდომა პრეზიდენტმა გიორგი მარგველაშვილმა თურქეთში განვითარებული მოვლენების გამო დანიშნა. საერთაშორისო მედიის ინფორმაციით, თურქეთში სამხედრო გადატრიალებაა. ქვეყნის სამხედროების ნაწილმა სტამბულისა და ანკარის აეროპორტები და მნიშვნელოვანი ობიექტები დაიკავეს. ისმის სროლისა და აფეთქებების ხმა. ასევე ვრცელდება ინფორმაცია, რომ სამხედროების ნაწილმა გენერალური შტაბის ხელმძღვანელი მძევლად აიყვანა.
