”აშშ-ის საავიაციო ხელისუფლების გადაწყვეტილების თანახმად, აიკრძალა ყველა ავიარეისი აშშ-სა და თურქეთის აეროპორტებს შორის. ფედერალური საავიაციო ადმინისტრაციის აკრძალვა მოიცავს თურქეთიდან და მის მიმართულებით მფრენ კომერციულ და კერძო საჰაერო ხომალდებს, ასევე ტრანზიტულ ავიარეისებს მესამე ქვეყნის გავლით, თურქეთიდან ამერიკის მიმართულებით",- აღნიშნულ ინფორმაციას "საქართველოს აეროპორტების გაერთიანება" ავრცელებს.
როგორც განცხადებაშია ნათქვამი, მგზავრებმა, რომელთაც ეს გადაწყვეტილება შეეხოთ, შესაბამის ავიაკომპანიას უნდა მიმართონ. "საქართველოს აეროპორტების გაერთიანების" ინფორმაციით, ამ დროისთვის ავიაკომპანიები ცდილობენ მგზავრების გადამისამართებას ალტერნატიულ მარშრუტებზე.
ჯერჯერობით უცნობია, თუ რამდენ ხანს გაგრძელდება დაწესებული შეზღუდვა. თუმცა აშშ საავიაციო ხელისუფლების განცხადებით, ისინი სხვა უწყებებთან ერთად აკვირდებიან მიმდინარე პროცესებს და განვითარებული მოვლენების მიხედვით მიიღებენ შემდგომ გადაწყვეტილებებს.
"შპს "საქართველოს აეროპორტების გაერთიანება" უწყვეტ რეჟიმში აგრძელებს მუშაობას და შეზღუდვებთან დაკავშირებით განახლებულ ინფორმაციას აუცილებლად შეიტყობთ ჩვენი გვერდის საშუალებით”, - ნათქვამია განცხადებაში.
